بسم الله الرحمن الرحيم

السلام عليكم ورحمة الله وبركاته


روتين يومي


تصحى من منامك على صوت المذن وكريشتك واصلة لركبك تتمغط لين

تصك أطراف أصابعك في المروحة اللي الحمد لله أنها على رقم خمسة وإلا

كان أصابعك طايحه ورى الدالوب...


تتعوذ من الشيطان وحافي لين دورة المياه وأنت في الطريق توطى بكلة

وشباصة وتتعثر في خلاقين المدام كله عادي بس أهم شئ لاتولع النور عشان

ماتزعجها لاتكرهك في اليوم اللي أنولدت فيه...


تتوضاء وتروح تصلي ثم ترجع لسيارتك لأن سعادتها مافيه أمل تستحي على

وجهها وتقوم تصلح فطور فالأفضل تدق على حسن الهندي راعي البوفية

تقول له وش مشتهي تفطر وهو مايقصر ولايتأفف حتى لو مامعك فلوس

عادي يصبر لك لآخر الشهر...


طيب أنا اليوم مداوم صباحي ودربي شرق وبوفية حسن غرب وبعدين حسن

يفتح من الساعة ست والآن خمس ونص يالله خليني أتمشى في السيارة...


كانك من تصبح الصبح على بالك أنك بتشم أكسجين نقي من تفتح الشباك

تلاقي التريلا اللي شكماناتها على شباك سيارتك، وسواق التريلا يستمتع من

يكون عند الإشارة ويدبل الأبنص (أعن أعن) لينه مالي عليك الغمارة بدخنة

الديزل ومايمديك تكحكح إلا واحد من قليلين الحياء يضرب بواري وراك تقول

أنك واقف قدام عجلة التقدم للدولة وشوي من تمشي تلاقي اللي من الجهة

اليمين سبحة وأنفلّت بيدخلون بينك وبين الرصيف...


صور حضارية جميلة كل يوم نشوفها في مدينة الرياض...



الغريب تلاقي الإشارة ودها تنتحر أحياناً من كثر مايقطعونها ياأخي إذا

مستعجل قم بدري وروح لعملك بدري لاتحطمنا في أنفسنا من يقولون

السعوديين شعب متخلف وعشوائي وغير منظم لاحظ ترا كلها بسبتك أنت

وأياه وأشكالكم اللي لو كان السراء أو الطابور في إثنين ماتلاقي واحد قدام

الثاني لا تلاقي الأثنين جنب بعض يتطاقون من يصير الأول ...


والله عاد من الذرابة والأخلاق الحميده في هالناس وخصوصاً ربع بنااااااخي

مبسوطين جداً على الهمجية..



يالرياض ترى أنا عن نفسي مليييييييييييييت وطقت تسبدي خصوصاً لاجاء

دوامي صبح لاهو من هالمرأة ولاهو من الطريق ولاهو من هالعمل الممل

جداً وسبب الملل فيه أنك ماتدري وش أنت عليه مرة صبح ومره ليل ومره

عصر والمشكلة مش دوران لاكل ستة أيام ينقلب دوامك مايمديك ترتب نفسك

إلا تغير والأبله المسئول مايهمة ليه لأنه يداوم منتظم ويفكر عملية الورديات

عملية مريحه....


عموماً كذا يبتدي روتين يومي أنا مامليته رغم أنه ملني وطفش مني لدرجة أن

الشمس إذا شافتني الصبح ظاهر عطتني بظهرها وبينت الدنيا غيم من كثر

ماني مطفش الدنيا بشكواي وتذمري من كل شئ ولافيه شئ عاجبني (كاره

اللي في السنافر)...


والسلام عليكم ورحمة الله وبركاته