بسم الله الرحمن الرحيم




السلام عليكم ورحمة الله وبركاته،،،




الدنيا حلوووووووة








تفتح التلفزيون بعد صلاة الظهر تلاقي فيه برنامج إثنين شباب مشخصين

ريحة عطورهم تشمّها من ورى الشاشة لابسين ثياب بيض ويتضاحكون

ويقولون الدنيا حلوووووووة...


تدور لك عود أسنان عشان تضغط اللي يغير القناة لأن الريموت مكسّر

والأزارير داخله جوا من كثر مالشباب عيالك الله يصلحهم منتفين الأزارير

وعلى بال ماتلقى عود تلاقي واحد من الشباب اللي في التلفزيون يشكر في

التنمية والحكومة ثم تتفل على الشاشة (حاشاكم) (من قهرك من نفاق الإعلام)

مافيه أحد يقول الصدق وإلا أني الوحيد اللي معاني...



أنا أجزم بلا الجازمة أن هالإثنين من عيال الواسطات وأنه بمجرد ماتخرج

بتقدير مقبول من جامعة الإمام قسم إعلام إلا وظيفته جاهزة ووين في القناة

الأولى للتلفزيون السعودي لأن القناة الثانية تبي لها إنجليزي ومخلينها لعيال

الضعوف عشان يتسابقون عليها والقناة الأولى هذي اللي يتفرجون عليها

الفقراء والمساكين اللي يطلعون لهم هالبزران ويتّريقون على مشاعرهم

بإهامهم أن الدنيا بخير بس أن حظك يالفقير نحس ليه ماصار أبوك وإلا أخوك

معالي وإلا من الديرة الفلانية وإلا من جماعة رجلاً شرواهم....


تغير القناة ثم تطلعك مذيعة في قناة إقتصادية لابسة ضيق في ضيق لدرجة لو

سوت حركة مفاجئة كان تفتقت ملابسها وحاطه في وجها أحمر وأبيض كنها

لزقات الحفريات اللي تشوفها في الشوارع وأبتسامتها واصله المريخ وتقول

لك السوق السعودي مستقر الأوضاع بل إنه سجل إرتفاع في الربع الأخير من

عام 2009 وتصفقك ذيك العبرة من تقلب التسعه وتصير عام 2006 وتتذكر

كيف نهبوا فلوسك بدون أحم ولادستور والدموع تنزل على صدرك كن عينك

معرّقه وتجيك المدام وتسألك ورى عيونك تدمع ولاتدري وش تصرفها وتقول

لها أبد من ريحة البصل اللي في خلاقينك (مسيكينة هالمرأة مجبورة تتحملك

تورطت بك وبها العيال)...


تطفي التلفزيون وتلبس خلاقين الدوام لأن دوامك مسائي ومن خوفك من البرد

مايبقى خلق في البيت مالبسته ثم تتدربا لحد الشارع لأن من ضيق البجامة

الداخلية وشراب العايلة (حاشاكم) تحس أنك ملزق بشطرطون ماأنت لابس

ومن توصل هالونيت موديل 78 أبو عزيز تتذكر كلمة الشابين اللي في القناة

الأولى (الدنيا حلوووووووة) ثم تبلع ريقك عن مرارة صبرة وحلتيتة ومرّة

وتحاول تفتح الباب اللي جيم من تغيرات الجو وبعد معاناة عجز يوصفها خالد

الفيصل ينفتح الباب ثم تدخل المفتاح في السويتش وتحاول تشغل وتحاول

تشغل ولاتشتغل السيارة لين جارك يوقف سيارته عند بابه وبسرعة يزرق

لبيته يخاف أنك تقول له إشتراك وإلا مساعدة...


تبدى عاد تدور العامل حق البلدية أو أي باكستاني يساعدك تدفون السيارة

عشان تنتعها وبعد غارت جوية وزحف بري في الشارع تلقا إثنين باكستانية

نايمين على كرتون تايد من العرقان طابع في ظهر الأول بالعربي وفي ظهر

الثاني بالإنجليزي وتترجاهم عشان يساعدونك ويقولون لك نبي فلوس وعاد

راتبي بالميلادي يعني لسه مانزل تقول عادي أرهن عندكم إستمارة السيارة

مير ويبكووون ويقولون لي يالله ياشيخ أمشي نساعدك...


ويدفونك لين وصلت سرعة السيارة ثمانين وتنتع وتنتع وتعيي السيارة تشتغل

لاحول ولاقوة إلا بالله ثم يرجعون ويدفونك وبرضوه عيت تشتغل وفي الأخير

بعد ماأبعدوا بك عن البيت ثلاثة كيلو تكتشف أن السيارة مافيها بنزين وتقلّب

في مخابيك وتقلب في طفاية الدخان هلل لين مافيه لأنهم صاروا يحرجونك في

المولات تتبرع فيه للجمعيات...


المهم وتوقف عند المحطة وتقول له عبي بنزين 91 تسعين اللي لونه أخضر

سعودي حقنا يالسعوديين بعشرة ريال ومن يعبي تمد له البطاقة حقت الأحوال

ويطلع لك ذاك المعروض بممانعة رهن البطاقة من وزارة الداخلية (ياسبحان

الله مانعين رهن البطاقة ولاعرفوا ليه أحنا نرهن البطاقة؟؟؟) المهم وتحب

راس صديق وترهن عنده الإستمارة لأن الجوال مرهون عند راعي البقالة

والساعة مرهونة عند راعي البنشر ماعاد باقي إلا ترهن عيالك عشان تقدر

تعيش وإلا تنفصل من دوامك وتدمر حياتك...


ومن يوافق وتشتغل السيارة لين اللي أرتفاع ماهوب مؤشر البنزين اللي

التناكي علوووه معشش فيه أبو عشيش (العنكبوت) آخر مرة تعبى فل (مليان)

أيام الملك خالد الله يرحمه ويرتفع أمبير الحرارة للخط الحمر الإتش وتنصى

البنشر ويلقطك بحلقك وين العشرة حقت رقعت التيوب لس وتتفلت منه بالقوة

وتلقط لك سطل وتكبة في الأديتر لين بردت السيارة ثم يجيك اليماني اللي

داخل متسلل وفتح بنشر بأسم واحد من هالمواطنين يعطيه في الشهر ألف

ويربح ثلاثين ألف والجوازات ماتدري عنه ولو بلغتهم حققوا معك وش دراك

أنه متسلل يمكن كان وحرس الحدود على خط واحد وطلع مع طلوع الكورة...


المهم ويقول لك الساعة خربانه وتضحك علي وتترجاه لين يخليك ثم تطلب منه

جركل الموية يعطيك أياه عشان توصل لدوامك إحترازاً لاترتفع ثانية

(بصراحة حلوة إحترازاً أحس أني أديب وأنا أكتبها)...


ومن تركب الدائري لين الزحمة واصله حدّها أنت تتحكحك من الحرارة

وجسمك يقرصك كنه لحظة طلوع النمل من المدارس وجالسين يمشون على

جسمك لين على اليمين من الدائري اللي صار أسمه الزحامي من الزحمات

على يمينك التريلات اللي وأنت مفتح الدرايش ينشقونك ديزل لين صرت

مدمن ديزل ولو ماشميته ذاك اليوم تحس بدووخه وعلى يسارك تلاقي

السيارات الجديدة 2009 و 2010 وتتذكر حملة "خلوها تصدي" وتدري

ماصدى إلا قلبك لأن هالشعب زلايب مايصملون على شئ قاطعوا البيبسي

إسبوع ويرجعون له تقول أنه يطول العمر...


المهم وتشغل الرادو على إذاعة القرآن ثم يطلع لك شيخ يتحدث عن التبذير

وعدم الإسراف وأنه يجب على المسلم الإقتصاد في كل شئ ولأن هالإذاعة

مايستمع لها إلا كبار السن والفقراء كل مواضيعها ياعن اللبْس والعين والسحر

والجن والشياطين وإلا عن المشاكل الزوجية وإلا وعظية عن التبذير

والإسراف وغيرة مايدرون أني وأشكالي ندور نأكل ولالقينا الظاهر أنا نبذر

في الهواء اللي نتنفسه يالله أحسن مافيها أنك تسمع القرآن وأذآن بن ماجد الولد

الله يرحم أبوه ويطول بعمرة والصلاة في الحرم...


وبعد رحلة شاقة من حدحدت التريلات والدينات توصل للعمل لين مديرك

مكشر تحس أن تكشيرته هي سبب زحمة الدائري وتسلم عليه ولايرد وتبي

توقع لينه مجهز لك خطاب إنذار يومين من الراتب (يالعنبوا هالخمسة في المية

5% اللي تناتفوها التجار والمسئؤلين قبل لاتظهر) ولايهمّه أصلاً وش أخرك

طالما هو بيأدبك على حد زعمه وبينصف الدولة كن هاليومين اللي مخصومة

من راتبك هي اللي تزيد التضخم في الميزانية وهو إذا جيت مبكر للدوام يجي

متأخر ساعتين...


تبدى دوامك على مرارة عجزت أنواع المرارات من شري وحرمل وعوشزج

توصلها ولولا رحمة الله وخوفك من عقابه علقت رقبتك في سلك وطبيت

والمشكلة لو ماتموت وتبقى بس مريض عاله على أهلك يراجعون بك في

الشميسي اللي تدخله متعافي وتطلع منه معك مرض مزمن وتصبح حالتك

ميئوس منها يالله الدنيا حلووووووووة...






والسلام عليكم ورحمة الله وبركاته،،،