بسم الله الرحمن الرحيم

السلام عليكم ورحمة الله وبركاته


وش هو الذوق


أثبت الشتاء أننا يالسعودين لانتمع بأي نوع من أنواع الذوق إلا وش هو الذوق هو يباع

في قواطي وإلا بالكيلو...!؟



يقال أننا بردانين ونبي نتدفى يالله سجل عندك...


بيجامة لونها بني مموه ببيج

يعني لو لبسها واحد حنطي وشفته من بعيد كان راهنت اللي معك أنه مفصخ...




سروال السنه

طرفة من ورى عليه غبار لأن أبو الشباب ماغسل السيارة عقب المطار والدعاسة

مطينة وطرف السروال مضبط الطين ومتحظنة طول ماأنت تسوق...




فوق السروال فنيلة أم رقبة

مليانة نيل طالعه مع الدقن اللي بادي يظهر كنها حبت البركة على عجينة ماأنخبزت...



نجي عاد للثوب

اللي ياأما كروهات (مربعات) ينلعب عليه ملطاخ أم تسع وإلا مقلم كنه دفتر تقليد عاد

اللون ياأما بني وإلا كحلي وإلا رصاصي وإلا أسود مشهب...




الكوت


ويقال أبو الشباب ذرب لابس فوقة كوت طالع كنه يماني الكوت في الغالب لونه أسود

في أكمامة أربعة أزارير يقال أنها سبير طلع لاند كروزر خليجي أستبنتين ماهو كم....




الطاقية


والطاقية الصوف اللي لين أشرقت الشمس أنواع الحكحكة...




الغترة الصوف


ثم نجي عاد للسالفة الغترة الصوف اللي لونها بيج وفيها خط كحلي ماأدري بالضبط

اللي صممها وش بيقنعنا؟؟؟ أها يعني أن الهلال زعيم آسيا...




الجزمة

وتكرمون الجزمة سودا وتجتها شرابين العايلة لونه أخضر هذا اللي تحت واللي فوق

لونه كحلي يمشي مع الأسود بكريم يقال أنه وطني (يمدحونه في الشتاء) والجزمة

منعفطة من ورى عشان أبو الشباب ماسمع بالملعقة أبد...




الوازلين


ثم يتدهن الواحد بعلبة وازلين لين يغدي كنه فحمة طاقها المطر تلمع...




الإكسسوارات



ثم دق اللطمة وخذ معك الفروة السورية اللي لونها لحمي وداخلها جاعد أطيب للخياس

والبشت الوبر اللي لونه بني فاتح كنه كشنة على رز عشان لو صار برد لينك

مزبن نفسك...



أموت أنا في الجنتله عندنا ياأخي تحس في الشتاء أن السعوديين طليان من الذوووق...


لاحظوا الألوان تحسون أني برداااااااااان


والسلام عليكم ورحمة الله وبركاته