يوميات شيخ النظر

**أم مالك الأزدية** · July 16th, 2009, 23:24

أين أنت يا شيخنا الهمام ؟؟
سنبدأ بالخصم عليك مقابل التغيب

الرائد7 · July 21st, 2009, 16:33

السلام عليكم
نسأل الله أن يكون عودك إلينا قريبا
فقد اشتقنا إلى سماع حديثك
دمت بخير أخي الكريم

**شيخ النظر** · August 20th, 2009, 21:52

المشاركة الأصلية كتبت بواسطة الرائد7

السلام عليكم
نسأل الله أن يكون عودك إلينا قريبا
فقد اشتقنا إلى سماع حديثك
دمت بخير أخي الكريم

[align=center]بسم الله الرحمن الرحيم

السلام عليكم ورحمة الله وبركاته

يعلم الله أني أتمنى أن أحظى بالتواصل معك عن قرب وأعلم أن الله لن

يحرمني من ذلك دمت أخي الكريم وطاب فالك...

والسلام عليكم ورحمة الله وبركاته[/align]

**نجم سهيل** · July 21st, 2009, 20:30

المشاركة الأصلية كتبت بواسطة أم مالك الأزدية

أين أنت يا شيخنا الهمام ؟؟
سنبدأ بالخصم عليك مقابل التغيب

لالالا وش يسوي الخصم ؟؟
انا اقول نذبحه ونحطه في الحبس

حتى ما يتعودها

**شيخ النظر** · August 20th, 2009, 00:45

بســم الله الـرحمــن الرحيــم

السلام عليكم ورحمة الله وبركاته

عودة الشيخ

عنتر زمانه : وقف وين رايح!؟

شيخ : بأدخل ليومياتي...

عنتر زمانه : أي يوميات صارت سنويات شهرين لالك حس ولارس...

شيخ : يعني الحين فقيدة...

عنتر زمانه : من هي...

شيخ : أنا يعني كنت مفقود عندك وأشكالك...

عنتر زمانه : أيه ماتشوف كثرت الأسئلة عليك...

شيخ : قلت يمكن الشباب يجربون يحطون أسئلة الدور الثاني فيني

ويتمرنون على كيفية وضع الأسئلة خاصة بعد هالبرامج اللي ناقلينها من

تعليم مصر لوزارة معارفنا..

عنتر زمانه : وانت للحين لسانك طويل..!؟

شيخ : لا لا لا يالأجودي قصر من كثر شرب الماء البارد في هالصيف

شمر الظاهر أنه ماهوب أصلي...

عنتر زمانه : حلوة... إلا وين رحت له في هالصيف..!؟

شيخ : لارحت ولاجيت قاعد في الرياض...

عنتر زمانه : أجل مهرجانات الرياض شئ هالسنة...

شيخ : من هو شئ وأي سنة من خبرت الرياض وهو على نفس الحال

لاتغير ولازان بس فاقدين أبو فهد (الأمير سلمان) الله يرده بالسلامة...

عنتر زمانه : آمين ليه ومهرجاناتكم...!؟

شيخ : مهرجاناتنا حلوة غبرات وحرارات بس أهون من سعير أبها وجدة

التحرير وغرابال الشرقية...

عنتر زمانه : كيف...!؟

شيخ : أقول لك جدة تقول أنهم بداؤوا في الإنشقاق إجتماعياً من حيث

تجردهم من العادات والتقاليد وياأخي ذا الحجز كانوا مضرب المثل

بالرزانة والعقل والحين صاروا للنتانة والهبل وأكيد ماهو كلهم ولكن رواد

المجمعات والأسواق ناقص يقلبونها فلّه...

عنتر زمانه : ياخوي هذولي الشروق اللي خربوها...

شيخ : هذي مشكلتنا للحين شروق وغروب وناسين أننا وطن واحد ولو

العيب في أي مكان في السعودية يبقى شامل لنا كلنا وإلا الخير يخص

والشر يعم وبعدين جدة بزود على مدار العام ناقص يخلون الدخول لها

بفيزة وجواز سفر...

عنتر زمانه : حاجة زي كذا...

شيخ : إلا هي كذا والعنز ماتشوف جرتها وربعنا على هالحال ماشين كلاً

يعايب الثاني وهو أردى منه...

عنتر زمانه : طيب وأبها والشرقية...

شيخ : أبها مامن جديد نفس الحاله كورة ومحاله مع أرتفاع في الأسعار...

عنتر زمانه : ياخوي الزين قيمته فيه وإلا بعد تبيهم يعطونك ببلاش...

شيخ : اللي ببلاش مايتهياش بس على الأقل أسكن وأكل وأشرب في نفس

المستوى اللي أنا عايش فيه في الرياض ماهو أروح أتبرد وأتمرمرط وإلا

أطفر لحد الشحااااااذة من كثر ماالأسعار ملتهبة...

عنتر زمانه : أهاه والشرقية...

شيخ : آه يالشرقية حبها في قلبي لكن رطوبتها وغلا أسعارها بيكرهني فيها

وبرود أنشطتها تقول كنك في قرية ماأنتب في منطقة بس أسواق زحمة

وبلا تنظيم غير مغازل الشباب للحريم....

عنتر زمانه : لاحول ولاقوة إلا بالله...

شيخ : هذا الصدق بناتنا وشبابنا يادافع البلا عندهم هالصيفية فرصة للتحرر

ماهو لمراجعة النفس والتغيير للأفضل وأولياء الأمور دجة ورجة لاخير

في كلامهم ولابركة في حضورهم وهالحكي صار واقع نشوفه في مجتمعنا

ونسوي أنفسنا ماشفنا...

عنتر زمانه : أنت وراك ناقم على الناس وشاب فيهم...

شيخ : ضنك انلام!؟؟؟

عنتر زمانه : لاتعليق...

شيخ : طبعاً لاتعليق أيامنا كان فيه مراكز صيفية وكشافة ورحلات

وطلعات الأسر للبر والتخيم على البحر مابين الشرق والغرب ناهيك عن

الطلعات للطايف والباحة وأبها ومامن خساير ولامشاكل أجل بالله عيال

هالوقت عيال فيهم نخوة ورجولة؟؟؟

كان واحدهم لو يمر من عند بيت ويلقى كيس زبالة (حاشكم) إلا وشغل

البلوتوث وقام يدور عليه يحسبها وحدة تطل...

عنتر زمانه : وش تقصد يعني العباية صارت مثل كيس الزبالة

(حاشكم)...

شيخ : أكيد أنت مواطن أصلي لأن تفكيرك سلبي للغاية وليه ماقلت أن

اللون واحد والقدر مختلف إلا لأنك تحب تنكس الأمور...

عنتر زمانه : ماتعلم نفسك...

شيخ : أنا ماهوب اللي أقول لكن صفحات الحوادث والأحداث هي اللي

تقول ولايتعض حدانا إلا لين جت في رأسه الله يستر على المسلمين

أجمعين...

عنتر زمانه : ماعلينا أنت وش علومك وأخبارك وين هالغيبة...!؟

شيخ : أي غيبة شريت هالبيت وقعدت أدابل هالعمال شيل وحط وتأثيث

ولاعندي لانت ولاتلفون ثابت لين قالوا لي ترى بكرة دوامك...

عنتر زمانه : ليه مانقلت التلفون وإلاساكن في منطقة نائية!؟؟؟

شيخ : أيه بالنسبة للسي سي سي شركة الدجة هم وشركة الأكاذيب اللي

معلقيني من شهرين كل يوم باكر ولاصار شئ والغبنة جاري اللي قبال

بيتي عنده تلفون بس عشان يمدون من بيته لبيتي يحتاجون بيروقراطية

الموافقة والروتين الممل لكل منشاءة عربية...

عنتر زمانه : طيب ماتروح مقهى وإلا نادي وتكتب لنا أخبارك...!؟

شيخ : لا ياشيخ هذا اللي ناقصني أنحشر مع هالبزران دخان وصجه

ولجه...!!!؟

عنتر زمانه : أيه وش فيها..!؟

شيخ : أقول أها بس ماعلينا هذاني رجعت وراح أكتب بشكل يومي مثل

ماكنت وعسى الله يسهل وإنشاء الله ألاقي في الصدور متسع لكتاباتي....

والسلام عليكم ورحمة الله وبركاته

**شيخ النظر** · August 20th, 2009, 21:55

المشاركة الأصلية كتبت بواسطة نجم سهيل

لالالا وش يسوي الخصم ؟؟
انا اقول نذبحه ونحطه في الحبس

حتى ما يتعودها

[align=center]بسم الله الرحمن الرحيم

السلام عليكم ورحمة الله وبركاته

أخي الكريم...

خبي عدتك لما بعد ثلاثة أشهر فمازال الوقت باكراً على عيد الذبح وبعدين

لو مسكتني ذيك الحزة أسجني وأقتنلني ولايهم شنباتك...

والسلام عليكم ورحمة الله وبركاته[/align]

**شيخ النظر** · August 20th, 2009, 21:49

المشاركة الأصلية كتبت بواسطة أم مالك الأزدية

أين أنت يا شيخنا الهمام ؟؟
سنبدأ بالخصم عليك مقابل التغيب

[align=center]بسم الله الرحمن الرحيم

السلام عليكم ورحمة الله وبركاته

أن غبت عن أعينكم فقد مكنني الله في قلوبكم فأين مفري وأنتم أحبتي وأهلي

أشكرك أيتها الفاضلة على السؤال والتواصل ودمتي

والسلام عليكم ورحمة الله وبركاته[/align]