بسم الله الرحمن الرحيم

السلام عليكم ورحمة الله وبركاته،،،

شارين رجال






جات أمه وأخته وشافوا المرأه لينها ذيك اللي وجه ودين وأخلاق عالية ومن

راحوا للبيت والله ياخوي والله وتهبل وتخبل لين يغدي قلبك يطبل ...


ماصبر الرجال لقط أبوه ببشته حق مراجعة على المحاكم ونصوه لبيت أبو

فاتن ومن وصلوا والتراحيب والبخور...


المهم أبو راشد يبادر بالحكي والله ياأبوفاتن راشد شوفت عينك ومتربي تحت

نظرك ورجال من البيت للمسجد للدوام وبصراحة ماراح نلاقي له أحسن من

فاتن عسى الله يحرسها وبنات المسلمين...


ويرد أبو فاتن لو أنها ذبيحه ماكفتكم (بعض الحكي ماله سنع) وأحنا أن

وافقت موافقين...


أبو راشد : على بركة الله ولنا طلب بسيط إذا أمكن الشوفة الشرعية ونبي

تعلمون طلباتكم...


ابو فاتن : حنا ياأبو راشد شارين رجال ونبيه يصون بنتا بس ومثل ماقال

المصطفى صلى الله عليه وسلم : ( بشروا ولا تنفروا ويسروا ولا تعسروا )

لذلك مانبي منكم شئ غير ريال واحد مهر والله يجيب التيسير...


وفعلاً تدخل فاتن على راشد لين من مافيها من الزين أحولت عيونه لدرجة

عسكّر عند بيتهم خوفاً لايغيرون كلامهم...


ومن أعرس عليها وهو ماهو مصدق أربع وعشرين ساعة في البيت مقابله

وبما أن الشاب السعودي يعاني من كمية مبالغ فيها من البصاقه كان دائماً

يأشر لها بالريال اللي هو مهرها بعزم أنه ظريف ومزوح وإذا طلع ريالين

قال هذا يجيب منك ثنتين...


وكانت فاتن تتضايق من ثقل طينته بس الشكوى لله لابد تتحمل على أمل أنه

يتغير هالآدمي وبعض الناس لاسكت له ينبّق (يعني يتمادى)..


لدرجة تصدقين مشروب الطاقه أغلى منك حتى المارس والكاكاو وكل شئ

بريال يعيرها بها وماأن خلاص كيس البصل اللي هو يفترض كيلو عسل حتى

رجعت منهاره لأهلها أرخصتوني فقام يذلني ويعيرني بريال بريال...




ويولع الشويب وقال لبنته أبشري بالسعد يابنتي أنا بريال شرينا رجال مابعنا

منك مثقال لكن أنه ماهوب كفو وأوريك فيه...


وجاك الأبله راشد من باكر بيأخذ فاتن لين أبوها يقول له رح جب الوالد

وتعالوا تقهووا عندي...


ولما جاء أبو راشد ويقلطونهم وتجي ذيك القهوه اللي تحتها ريال ويستغرب

أبو راشد الحركة فضن أنه من أحد الأطفال طايح وإلا شئ...!!!


المهم ويقوم أبو فاتن بسحب الريال من تحت الدله وأعطائه لأبو راشد وقال

له حنّا بريال شرينا رجال وطلع ماهوب كفو فإذا بغى بنتنا يجيب مليون ريال

ويآخذها غيره الله يستر علينا وعليكم...


فألتفت أبو راشد لولده لينه مدنقن رأسه وتوه يحس الثور ويناديه راشد

ويرفع رأسه بأستحياء نعم يباااه قال له تف عليك من ولد ماأنتب كفو

حشيمه لكن تبي البنت رح جمع مهرها من جديد بنفسك...

وللآن الخبل راشد يجمع مهر فاتن من جديد فإذا واجهتوه في أي مكان

لاتعطونه إلا ريال خلوه ينذّل مليون مره ومن أهم مواصفاته مكتوب على

جبهته خبل ماحمد الله...


والسلام عليكم ورحمة الله وبركاته،،،