يوميات شيخ النظر

**شيخ النظر** · June 29th, 2009, 13:01

بسم الله الرحمن الرحيم

السلام عليكم ورحمة الله وبركاته،،،

عيوبي

منطلقاً من كلمة الصحابي الجليل خالد بن الوليد رضي الله عنه (تمايزوا

أيها الناس لنعرف من أين نؤتى) ومن القول المأثور (رحم الله امرءاً أهدى

إلي عيوبي)

إليكم أعزائي الأحبه أرجو منكم توجيهي بنقدكم الهادف والبناء ولاتكتفوا

بالقرأه فما يثلج الصدر أن معدل القرأه يبلغ قريب الثمانية الآف بينما

عدد المداخلات قليل جداً بحجم ماهو مطروح والذي لم أرى فيه إلا قليلاً من

الأراء التي أعتز بها من كل شخصاً بذاته فلذلك أرجو أن لاتحرموني من

أرائكم التي حتماً سأعمل بها أياً كانت فأنتم من يتلقى ماأكتب مع علمي

بكثرة أخطائي الإملائيه والتي أعمل جاهداً على تطويرها بكثرة القرأه

والكتابة

والله من وراء القصد....

والسلام عليكم ورحمة الله وبركاته،،،

**شيخ النظر** · June 29th, 2009, 13:02

بسم الله الرحمن الرحيم

السلام عليكم ورحمة الله وبركاته،،،

مطوّع الحارة 2

طلعت من الدواااااااام ولين البيت هجده ماتسمع إلا بيتهوفن يعزف

مقطوعاته على الشخييييير وأغير ملابسي وأندس في الفراش عشان أقوم

اصلي الجمعه ورجاني نوووم قلت أقوم أشوف متصفحتي ويرن المنبه

الساعة إحدى عشر ويصحون عيالي وأفطرهم

وأروح للمسجد وياهم نصلي ولما صلينا تدق علي غالية تقول عجزت

أصحي عمتي وأمي عيّوا يقومون جب معك غدى وأصلي وأرجع وأحاول

أصحيّهم لينهم جثث مرميه على الفرش وأتغدى أنا وعيالي ومن أذن

العصر طلعنا نتمشى لين قبل المغرب وبرضووووووووه نايمين وأخذ

الأولاد نصلي المغرب لين أم نمر توها تصحى ومعصبه قالت وشهو له

مصحين من فجر الله الساعة ست ونص والله لونا مدارس ويضحكون

عليها العيال الحين المغررررررررب...

وتطلع تتأكد وتدق على الجيران ويعلمونها وتقوم تتسبح وتصلي وهي

تدعي لي على هالقراية وقالت أول مره تعرف أحد فيه الفايدة والله

ياهالمطوع ماشاء الله تبارك الله....

وين أم بندر بعد مثلي للحين ماقامت!!!؟؟؟

قالوا عيالي أنواع الشخير لدرجة أن الدور اللي فوقنا تصدعت جدرانه من

شخيرك أنت وأياها اليوم.....

المهم تلقط أم فهد التلفون وتكلم الجيران أم فلان وأم علان العادة اليومية

مراسلينها في الحي ولابد يزودونهابالأخبار اليوميه...

وأختي للحين نايييييييييييمه المهم ومن صلينا وتعشينا وألبس بأروح

للدوااااام إلا وألقى أبو نايف جارنا واقف عند الونيييييييييييت ولينه معقد

حجاجة وأسلم عليه وأسحبه للبيت تفضل ويعيي وقال يابو نمر عمري

قصرت معك بشئ قلت لا والله ليه قال الحين الشيخ صديقك المطوّع اللي

يقرى ماعمرك سولفت لي عنه وأناأحسبني مستودع أسرارك....

قلت أي شيخ؟؟؟ وأي مطوع ياأبو نايف الله يهديك قال اللي جبت لأم نمر

وأختك منه قراية في الليل قلت أييييييييييييييييه وشفيه قال نبي لنا من عنده

بطلين قلت ليه منقطعين؟؟؟

قال وش ذا الحكي الله يهديك بس أم نايف له أسبوع ماتنوم وماخلتني أنوم

وأنا بعد موجساً ضيقة تكفاااااااا ياجاااااار ألحق علينا قلت البطل بألف ويمد

لي 2000 ريال والنذل أبي أتسلف منه قبل يومين 100 ريال ويقول

ماعندي قلت بس اليوم جمعه والمطوّع وأمه معطلين فلذلك بكرة وأنا طالع

للعمل بأمر عليه الصبح وبأجيبها معي...

يتبع

والسلام عليكم ورحمة الله وبركاته،،،

**شيخ النظر** · June 29th, 2009, 13:07

بسم الله الرحمن الرحيم

السلام عليكم ورحمة الله وبركاته،،،

بيكبر وبيكون

الطفل البريء

في البيت تلاقيه حبوووب وطبيعي 100 %

لكن مع دخوله المدرسة .. ( تنمحي ) شخصيته ..

فتكثر الاصابات في وجهه .. لأنه مايدافع عن نفسه ..

دايم يجي مجلود وتلاقي رويسه كنه شوارع السويدي حفر ومطبات...

الطفل العنيد

يطبق نظام البيت بالعكس .. يسوي اللي براسه ..

مايخاف من امه وابوه .. لو قلت له هذا خطر لاتقربه .. عناد فيك يسويه ..

ياكثر مايضرب في طفولته .. ومع ذلك عنيد مايغير رايه ..

وهذا من المؤكد أنه صوره نموذجيه لأعداء التنميه والتطور في هذي البلاد...
تقول له مافيه وظائف يقول لك غسلوا سيارات وبيعوا خضار ثم يرسل لك
سيارات البلديه الصفر والعجيب مؤسسة البريد حاطه لوحه في مدخلها

كانك جاي تدور وظيفه ترى مافيه...

الطفل الحنّـان

يستخدم وسيلة الحنة لتلبية رغباته

له نغمه خاصه في البيت..

تلبى رغباته غصب عنك .. يعانون اهله من الصداع المستمر ..
وهذا مايجب علينا تعويد أبنائنا عليه متى ماأستمر الحال على ماهو عليه
فهو يحتاج هذي الميزه لأخذ حقه فلايصبح كمخه مثلنا إذا قالوا له لا عوّد بخفي حنين...

الطفل المادي

هذا الطفل مايرد السلام الا ( بفلوس ) ..

تعامله مع اهل البيت .. مادي بحت ..

يستخدمونه لتوصيل طلبات المنزل .. ونقل السوالف.. وكل شي بحسابه ..
وهذا من نوعية تحت الطاولة اللي بدأؤا يكثرون في مجتمعنا المسلم ياترى ليه؟؟؟؟

الطفل الفتّــان

تلاقي عند هذا النوع جميع اخبار البيت ..

يلاقي المتعه في اذلال غيره بالفتنه عليه ..

هذا الطفل حتى لو شريت سكوته بفلوس ..

توقع تلقى اخبارك ثاني يوم في الصفحه الرئيسية ..

في الجريدة الرسمية ..

وهذا غالباً مايخدم في الإف بي أي...

الطفل الدلوع

هذا دلوع امه وابوه .. يكرهونه باقي الاطفال لانه مرفه وشايف نفسه عليهم..

تلبى رغباته قبل ليطلبها .. شخصيته اتكاليه جداً ..

هذولي فئة طريق الملك عبدالله والتخصصي والتحلية ولاتهون المخيمات....

الطفل العله

يزعجك بأسئلته الي ماتنتهي .. يستفسر من كل شي .. حتى لو عطست ..

قالك شلون عطست .. وليش عطست .. وشلون تكونت العطسه ..

يحرجك احياناً .. ويمكن دائماً بأسئلته .. مره تجاوب عليه ومره تسفهه ..

واكثر الاوقات ماتلقى اجابه لاسئلته .. لانك في الحقيقه تجهلها ..

هذا فئة الطفارى اللي ينشدون عن كل شئ في النظام....

الطفل الداج

هذا الطفل مستحيل يجلس في البيت..

يعيش في الشارع اكثر من بيته .. خبره ودليل في كل ممر وطريق ..

يعرف طول الشارع بالسنتيمتر .. من الممكن ان يصبح اذا كبر مهندس طرق ..

يوووووووووووه ذولي شبابنا المتميز طيحني وكدش وشعور لين نص الظهر...

الطفل الملسون

يستانسون اهله على سوالفه .. فصيح جداً ..

ويلقط العبارات والمفردات بسرعة مذهله ..

يسبب احراج دائم لأهله .. يمكن يقول كلمة بالغلط للضيوف او الاقارب ..

يتميز احياناً بقلة الذووق والوقاحة اذا انفعل ..

لاينصح بأستفزازه ابداً ..

لين كبر غالباً ماتلاقيه متسدح في الإستراحات يصرح ويشجب ويستنكر....

الطفل اللزقه

تلقاه مسنتر عند باب البيت .. محد يطلع الا وهو لازق معاه ..

حتى الضيوف من الممكن تلقاه يلزق فيهم ويطلع معاهم ..

ياكثر ماينضرب .. وخاصه من اخوانه اللي اكبر منه .. او خواته ..

لانه عباره عن رادار على طلعاتهم ..

احياناً يضطرون يطلعون من شباك البيت للهروب منه ..

ولكن للأسف يلاقونه بانتظارهم في السيارة ..

ويسألهم ليش تأخرتوا عليّ ..
هذا لاكبر بيصير مدير بالواسطه ثم يبدى بمحاربة الناس....

الطفل الهادي

هذا الطفل ماله صوت ابد .. وين ماتحطه تلقاه ..

احياناً يهملونه اهله .. لانهم ناسينه ..

واحياناً يلقى اهتمام زائد من اهله ..

لو يموت من الجوع ماتكلم ..

في كثير من الاحيان تلقى اهله ناسينه بالسوق او عند الاقارب اثناء الزيارات ..

هذا يحسبنه عزيز نفس لاوكل حقه ولا طالب به...

الطفل القوي

اهله دائماً في احراج و مشاكل مع الناس ..

هرمون الاجرام مرتفع بنسبة عالية في جسمه ..

في كل جبهة طفل في ( منطقتهم ) تلقى له أثر وتوقيع ..((تفلع ))

يمثل القائد والفتوه .. يهابونه الاطفال ..

يتقرب منه الكبار ويتوددون له حفاظاً على سلامة اطفالهم ..

هذا غالباً ياضابط شرطه وإلا مجرم........

والسلام عليكم ورحمة الله وبركاته،،،

**شيخ النظر** · June 29th, 2009, 13:08

بسم الله الرحمن الرحيم

السلام عليكم ورحمة الله وبركاته،،،

تقسيم زحلات

يبون سكن

شيبان قاعدين في المشراق الضحى على الدكّه يسولفون أبو نوير وأبو

صالح...

أبو نوير : تصدق يقووووولون فيه تقسيم زحلات والتقديم في المشتري...

أبو صالح : صادق وإلا بديت تخرف؟؟؟

أبو نوير : خرفوك من رأس نخله بلا....

أبو صالح : أجل وش زحلات؟؟؟

أبو نوير : أجل وش تبيهم يسمونها أراضي وهي في زحل!!؟؟؟؟

أبو صالح : أهاه يعني في الصين...

أبو نوير : صدق أن القرايه تفتح المخ وش صينه الله يحيك هذي قراره

جديده توهم مكتشفينها...

أبو صالح : وش قرارته حقت القدر...

أبو نوير : ياوالله البلشة أنت ماتشوف تلفازيون القرارات هذي أماكن

كبيره آسيا وأفريكيا مثل الحين السعوديه في قرارت أمريكيا هي والدول

العربيه والهند وفي قرارت أورنبا وكا كذا...

أبو صالح : يعني زي منفوحه فيها شارع عشرين والنسيج وشارع

الأعشى والمقبره...

أبو نوير : مالت عليك وبلللللش في هالوجه وهو يكش في وجهه هذا اللي

ظهر معك...

أبو صالح : وراك ماتحشم الرجاجيل على هالصبح؟؟؟

أبو نوير : وينهم؟؟؟؟

أبو صالح : أقول تراك عاد فصختها....

أبو نوير : من هي؟؟؟؟

أبو صالح : قصدي عن البصاقققققه....

أبو نوير : الحين ظهرتنا من الموضوع تعرف أحد عنده كرسيدا أكس

إل؟؟؟؟

أبو صالح : وشهو له ناوي تروح الديره؟؟؟؟

أبو نوير : لا مامودمي تراك رفعت ضغطي والسكر وجبت لي الكابستلول

بجهلك...

أبو صالح : الله يحفظك منها طيب وشهووو له؟؟؟

أبو نوير : عشان نقدم على الزحلات من الكومبوتر...

أبو صالح : لازم عاد كرسيدا أكس إل؟؟؟؟

أبو نوير : أيه يقولون أنه يدقدق (يركض) بسرعه عشان يمدينا قبل

هالمشافيح...

أبو صالح : والله أنك صادق ذولي ربعنا أن صار فيه تقديم وإلا خير

تلاقيهم مثل القطاوه اللي يتطاقون على عظم دجاجه...

أبو نوير : طيب قم قم قامت عصبك نجمع أوراقنا ونروح ندور أحد عنده

كرسيدا أكس إل...

ويقومون ويروحون لبيت أبو راشد ومعهم معاريضهم مطلعينها من جيوب

الصدر اللي من داخل ويقدمون ومازال الإنتظار جاري لعلها تكون من

نصيب أحفاد أحفادهم....

والسلام عليكم ورحمة الله وبركاته،،،

**شيخ النظر** · June 29th, 2009, 13:10

بسم الله الرحمن الرحيم

السلام عليكم ورحمة الله وبركاته،،،

رايح

يالله بخاطركم رايح للدوااااام واليوم بيداوم ابو عبدالله بعد الدورة يعني

هالمنافقين بيجمعون قطّه وبيسون له عشاء وإلا غداء باكر

ومحسوووووووبكم مطفررررر حيل ماأحد معه سلف لأنهم صرفوا

الشرهات والشووونه هالأيام من الزحمات اللي في البنوك وأنا مليت أكون

سادي مع أبو عبدالله وحاب أكون وذف واقط معهم...

والسلام عليكم ورحمة الله وبركاته،،،

**شيخ النظر** · June 29th, 2009, 13:11

بسم الله الرحمن الرحيم

السلام عليكم ورحمة الله وبركاته،،،

ماسك عليك ممسك

أبونمر : تعال يابوي حك ظهري...

نمر : طيب أنزل لي شوي...

أبونمر : جب مركا وأرق عليها...

نمر : مايصير أحط رأسي برأسك وأنت أبوي...

أبونمر : عادي عادي بس حك بسرعة...

نمر : لا لا لا حتى لو رضيت أنا ماأرضى...

أبونمر : ليه ياتعبان...

نمر : أنت اللي تعبان ماهوب أنا وماأقدر لأني متربي...

أبونمر : حك ياحققققققققققققير لا أجلدك جلداً مبرحا...

نمر : تمون أنت أبوي....

أبونمر : يالله أنقلع خلك تجيني تبي شئ...

وأحك ظهري في الجدااااار بس ماااااش...

أروح أركض للمطبخ وألقط الملاس وأدخله في الفنيله وأحك وأحك لين

غرفت مرقة ظهري...

دمااااااان تصب بقّعت ثوبي....

وألاقي نمر يضحك مع أخوانه يقول أبونا أنقلب قطووووووووه يتقلب على

الجدراااان والأرض يتحكحك ثم جاب الملااااس ودخله في فنيلته وقعد يحك

به لين صب الدم وأبشركم صورته بالبلوتوث عشان لين قلت له شئ

ولانفذذذذذذذذذذذه أنشر البلوتوث على النت وأفضحه....

وأنا دموع الحسرة في عيني كيف يخوني بعد ماحبيته ووثقت فيه....

والسلام عليكم ورحمة الله وبركاته،،،

**شيخ النظر** · June 29th, 2009, 13:13

بسم الله الرحمن الرحيم

السلام عليكم ورحمة الله وبركاته،،،

المداخلات

من المبهج وجود المداخلات التي تدفع بي نحو الأمام ولكن ألاترون أن

الطيور تهاجر أعشاشها في تغير الفصول وتترك أشجارها لأسواط الخريف

كي يأتي الشتاء فيداوي جوره مما يتيح الفرصة للربيع بإعادة كسو هذه

الأشجار كي تستقبل الطيور مرة آخرى...

أن شح الأمطار في أي غابة كفيل بعدم عودة هذه الطيور فليس هنالك

مايدعوها للعودة في ظل الجدب والقحط مما يدفع بها إلى مواطن الربيع

أينما كانت...

في أحدى مواضيعي ذكرت إحدى الليبراليين الذي يناشد المؤذن أن يتصل

على المصلين عوضاً عن النداء للصلاة وشتان بين ذا وذاك فذاك دعاء

الرحمن باقي لقيام الساعة فلاحرمنا الله من سماعة خمسة أوقات في اليوم

والليله وهذا دعاء للإنسان بإبداء مجرد رأي فهل لي بطريق لربيعك أيسر

لي من عناء التواصل مع الخريف...؟؟؟

والسلام عليكم ورحمة الله وبركاته،،،

**شيخ النظر** · June 29th, 2009, 13:15

بسم الله الرحمن الرحيم

السلام عليكم ورحمة الله وبركاته،،،

أحبك ياوطني

وطني الحبيب كثروا فيك الأجانب بعضهم لإعماركم وأكثرهم لتدميرك

والمبكي أنهم بدأوا في إمتلاك العقارات من محلات وفيلات دون أي ضوابط

بحكم أنهم مستثمرين أضف لذلك بعض الخونه من ابنائك يبيعونك بوهب

أسمائهم لغير المستثمرين فالإنتباه الإنتباه كي لانصبح مثل دول أستعمرت

وشرد اهلها بسبب الجشع والطمع نظرة صدق ووقفة حق فأنا بهذه الحروف

لاأبرئ ساحتي ولكن كي لايلعنني أحفادي بأني بعت وطنهم للأعادي...

فقد أصبح أطراف الرياض للسعودين وخليط من الجاليات العربيه وماتبقى من

الرياض كامل للوافدين وأعلم ان مثله في معظم مناطق المملكه دون ضبط

ولا وجود نظام رادع لذلك فأنا أحبك ياوطني واحب ترابك وأجدادي علموني

الوفاء لك فهل من سامع لقلباً دامع؟؟؟؟

والسلام عليكم ورحمة الله وبركاته،،،

**شيخ النظر** · June 29th, 2009, 13:16

بسم الله الرحمن الرحيم

السلام عليكم ورحمة الله وبركاته،،،

وجهة نظر

غريب هذا المنتدى غرابة غير موضوعية لدرجة أثناء قرأتك لموضوع أهو

في المكان الصحيح أم لا فبعض المواضيع إخباريه وبعضها حواريه وبعضها

علمية وبماأنها في أماكنه الغير صحيح فقد فقدت بريقها ورونق التجاوب معها

فأصبح مدارت الخواطر يمنع النقل للمكان الصحيح وشوي شوي إلى أن

تضمحل الفواصل بين الأقسام لتصبح ساحة واحده...

أيضاً عندما يناقش شخصاً ما موضوعاً ما فمالجدوى من هذا النقاش إذا كان

يثير حفيظة القراء بالذود عن دينهم ومعتقدهم بأشد لهجة ممكنه فنفاجئ

بدروع تبرر لنا غير مانقراء فهل لنا أن نعرف المنطق الذي تقراء به مثل هذه

المواضيع لعلنا نصبح مثل من برروا لنا؟؟؟؟

إضافة هناك تساؤل عندما تدعو أحد المسئولين للساحات أين تنصحه أن

يذهب؟؟؟

خصوصاً أن صبغة هذا المنتدى بدت تتلاشى بين أخبار منقولة لاأعلم الهدف

من نقلها وبين أفكار لاتضيف للمتلقي أي جديد...

نريد طاولة حواريه تناقش واقعنا الملموس وحلول تساعد المسئولين على

تجاوز المحن في هذه البلاد فقد حدثني أحدهم أن الشعب أصبح من

ديموقراطية الحديث فقط شكّاء بكّاء غير مناصحاً لولاة الأمر والمسئولين في

شتا قطاعات هذه البلد المباركة وبماأن الدرة أكبر منتدى سعودي أناشد

جميع مرتادية بنظرة تعقل حول مايكتبون فنحن دعاة إصلاح لادعاة تدمير

فالقطاعات المنتجه يجب أن نصقلها ونبرزها للعيان ليحتذى بها والقطاعات

الغير منتجة يجب أن نضع الأفكار لتحويرها إلى منتجه وذلك عبر أفكار بناءه

وموضوعية تساهم في بناء الإرث لنا ولأولادنا وأحفادنا...

عزيزي القارئ وعزيزتي القارئه قبل أن تكتبا أي موضوع أو أي رد هل

فكرتما قليلاً ماذا سيضيف للوطن الذي ننتمي له وهل هذا الموضوع أو الرد

يحقق لك ولائك أم لا؟؟؟؟

والسلام عليكم ورحمة الله وبركاته،،،

**شيخ النظر** · June 29th, 2009, 13:20

بسم الله الرحمن الرحيم

السلام عليكم ورحمة الله وبركاته،،،

أفكار ليبراليه في بيتي

جميله : أبوي يلعب علينا...

غاليه : وشلوووووون أنا ملاحظة أشياء كثير بس وش تقصدين؟؟؟

جميله : إذا بغى يطلعنا ودانا لحديقة وجلس معنا وإذا بغينا السوق مايودينا إلا

لسويقة وشارع الخزان وفسحة مايعطينا بس شاري بسطة وعصير وغاثينا

بهالجبن والبيض والطحينيه...

غاليه : ههههه لا وأن تطور طلع بنا على الدائري وشوى لنا دجاجه على

ليحان وقراطيس وأن خربها مرررره جاب زعتر ولبنه...

جميله : تصدقين ماقد راح بنا للمولات وأن راح بنا خلانا في السيارة

ولايشتري منهم إلا خبز ياهوووووووو غريب هالأبو متى نكبر ونعرس؟؟؟

غاليه : أنتي فاضيه إذا أبونا ماسوى لنا بيجي ولد الناس يسوي لنا؟؟؟

جميله : طيب وش الحل؟؟؟

غاليه : أصبري يقولون المرأه بتسوق وبتصير عضو مجلس شورى وأحتمال

عضو مجلس وزراء مثل الكويت اربع نسوة في مجلس الأمه...

جميله : طيب ولاصار؟؟؟؟

غاليه : الدعوة شوي شوي لين يقعد الرجال في البيت ثم يتغطى وتصير الحياة

حريييييم ثم عاد نذوقهم المر مثل ماذقناه....

جميله : بعد انتي فاضيه لهم إلا بنطردهم من هالديرة ونقعد فيها بلحالنا ملابس

وأسواق وزوجات وملاهي وسعة صدر ولارجال يوطوط....

غاليه : لا حرام أخواني وأبوي مساكين هذولي أهلنا....!!!

جميله : هذولي أول ناس بنطردهم عشان مايلوثون البيئة بأفكارهم....

غاليه : آه ياوخيتي متى يجي هاليوم...

جميله : بس عارفة فيه مشكلة!!!؟؟؟؟

غاليه : وشهي بعد؟؟؟؟

جميله : إذا صارت الديره كلها حريم بنخلص لأن مافيه تكاثر ولازواج...

غاليه : عادي أحسن وشهو له نجيب أحد يدبل كبودنا...

جميله : طيب وشولون نتكاثر؟؟؟؟

غاليه : أنتي ماسمعتي بأطفال الأنابيب!!!؟؟؟

جميله : إلا أبلتنا جايبه ثلاثة توائم منها...

غاليه : بس هذي الطريقة فإذا جاء ولد نربيه لين يبلغ ثم ننفيه وإذا جت بنت

تبقى معنا....

جميله : طيب ومن اللي بيسوي عمليات الإخصاب؟؟؟؟

غاليه : عاد من قل الحريم مثل ماتعرف تتطبخ تتعلم التلقيح بواسطة الأنابيب

وقضينا...

جميله : صدق أنك فطينة ياأختي...

غاليه : أصصصصصصصصصص صه صه شكله أبوي جاء ذاكري عشان

مايصجنا هو وكريشته كنّه بالعاً زيتونه...

أبو نمر : السلام عليكم ياأحلا بنيات في العالم...

غالية وجميلة : وعليكم السلام ياأبونا...

أبو نمر : وشلون المذاكرة يالغاليات؟؟؟

غاليه : شوفت عينك أحولينا من كثرها...

أبو نمر : بارك الله فيكم تبون شئ؟؟؟ أنا بأنوووم بس لاأحد يزعجني...!!!

جميلة : أيه نبي نبي أشياء كثيرة مزي الناس...

أبو نمر : وش عندهم الناس ماهوب عندكم؟؟؟؟

غاليه : قصدك وش ماعندنا!!!؟

أبو نمر : اللي هو...

غاليه : أشياء كثيرة البنات كل وحده معها جوال وفسحتها عشرين ريال وكل

يوم مريول وعندهم سواق وخدامه ومربية وطباخه ومن مول إلى مول

والخميس والجمعه يروحون مكه والشرقيه والصيف مصر وماليزيا وغيرها...

هذولي مايخافون الله مسرفين وقد رزقنا الله من الطيبات وأمرنا بالاعتدال في

المأكل والمشرب والإنفاق ولكن يغيب عن البعض ضرورة ترشيد الإنفاق

وعدم التبذير فيما حباهم الله من أموال ورزق إذ يظنون أن المال مالهم ولا

ينتبهون إلى أننا سنحاسب يوم القيامة عليه مرتين

وقد نهى الله عن الإسراف والتبذير في آيات كثيرة

فقال تعالى:

﴿ وَلا تُسْرِفُوا إِنَّهُ لا يُحِبُّ الْمُسْرِفِينَ ﴾

وقال جل ذكره:
﴿ وَلا تُبَذِّرْ تَبْذِيراً * إِنَّ الْمُبَذِّرِينَ كَانُوا إِخْوَانَ الشَّيَاطِينِ وَكَانَ

الشَّيْطَانُ لِرَبِّهِ كَفُورا ﴾

وقال سبحانه:
﴿ وَلا تَجْعَلْ يَدَكَ مَغْلُولَةً إِلَى عُنُقِكَ وَلا تَبْسُطْهَا كُلَّ الْبَسْطِ فَتَقْعُدَ

مَلُوماً مَحْسُورا ﴾

غاليه : وأنت تمشي الدين لخدمة مصالحك الشخصية بس؟؟؟

جميلة : يعني نموت من اللي نشوفه وإلا نغمض عيونا؟؟؟

غاليه : لاتقول طالعوا لتحتكم ماعاد تحتنا إلا الأرض وبعد مانملكها إيجار

بنطرد منه لو ماسددنا...

جميلة : شفت حتى بيت ماعندنا ولاعندنا أي شئ مثل هالناس وتقول ناقصكم

شئ إيييييييه ناقصنا الحياة يابوي افهم الحياة...

غاليه : وبعدين على حظنا المقرود كم ابو في الدنيا ماصار من نصيبنا إلا أنت

ياهالمنتف البخييييييييل...

أبو نمر : وأنا أكتم حسرتي وأقول الله يفرج على جميع المسلمين ماهم فيه...

والسلام عليكم ورحمة الله وبركاته،،،