محمد بن أحمد السديري

ليالي نجد

قالوا وحيد وقلت ماعندي اوناس = وقالو غريب وقلت بأرض بعيده
ابعدت ما بي شوف ناس من الناس = بعّدت عن بعض الملا وتعديده
مطاوع قلبي على كل الأجناس = والبعد عن شوف المكاره يفيده
اخترت بعد الدار عن قرب الأنجاس = عن دارهم نلقى ديار جديده
في وسط نجد ابتع هوا كل نسناس = واطرب لشوف اطيورها وتغريده
اعشق ليالي نجد لو انّها ادماس = وايّامها عندي جنان سعيده
شمى لعشب رياضها يقعد الراس = وما فات من ساعات عمري بعيده
شوف الزهر يبعد عنا كل هوجاس = ويريح عن قلب الشقا ما يكيده
وحس الرعد في رايح المزن رجّاس = دقات عود عند سمعي فريده
وان قال لي بعض المخاليق لا باس = قلت الهضايم بالضماير مجيده
الله من هم بالاضلاع غطاس = اقام وسط القلب وابطى شديده
فكّرت بالدنيا بتقدير وإحساس = ولاجت لي الدنيا على ما نريده
اللي نبي تقطّعت عنه الأرماس = وعنه اختفت كل العلوم الأكيده
القلب يبغض كل غادر وبلاس = اللي يلطخّ دم الأجواد بيده
واحب من يتعب على كل نوماس = ومن فيض جوده ما يمده الزهيده
اللي ليا كادت والارياق يباس = يصبر على كود الأمور الشديده
وللنفس عن طرق المثاليم حباس = يتعب على كل العلوم الحميده
واحب نجد وكل حبّي على ساس = حب بقلبي له قصور مشيده
عندي وعرها مع سهلها والاطعاس = غابات ورد في زهور نضيده
برياضها محلا هدد كل قرناس = ان شاف حفّان الحبارى تصيده
عدل المناكب لأبرق الريش دّواس = ما ناش في مخلاب كفه يجيده
ياحلو هدّاته على الجول غلاس = ينحر كثيره ويتعدى الفريده
اجرد عديم لهايش الخرب فراس = والطايره لو ترتفع ما تكيده
ايّام عجّات الهدد كلها اوناس = ياحلو بالخد البياح تهديده