يوميات شيخ النظر

**شيخ النظر** · June 29th, 2009, 13:22

بسم الله الرحمن الرحيم

السلام عليكم ورحمة الله وبركاته،،،

موعدي

من زمان أيام كان اصدقائي في العليا والسليمانية كنا نجمع مدة شهرين

عشان نروح نتعشى جنب العقارية اللي أصبحت حاجة مستقلة...

عندي اليوم شغل فيها وساعة لحد مالقيت موقف وكاني طول الطريق ماشي

والناس تكبس لي وتضرب لي قلت يمكن يعتقدون أني سارق الونيت من

متحف الملك عبدالعزيز لأن مثل ونيتي انقرض بس واحد معي في العالم كله

ومجمع فيه طوابع وعملات قديمه عشان لين الله رزقني أفتح له دوار في

جدة وأحطه متحف...

المهم والناس يالحبيب وقف طااااااااااط وتيييييييييت وأنا في بالي هذولي

من قرائي في القمة وعرفوا الونيت وقلت الحين يبوني أوقع

أوتوجرافات وإلا على ملابسهم وأنا عندي شغل ماهوب غرور والعياذ

بالله بس مانيب فاااااااضي لهم...

وبعد بماأني متغلي أكيد يدوروني في شوارع الرياض ياخييييييييي الناس

ذولي أجاوووووويد بالحيل...

وماأن وقفت الونيت إلا مليون سيارة وأسعاف ودفاع مدني موقفين جنبي

(طبعاً بتفكرووون سالفة الدخنه اللي تعجعج من السيارة طيب وش جاب

الإسعاف؟؟؟؟)....

(هاه فكرتوا ليه الناس تلاحقني؟؟؟؟).....

ياأخي بعد فكرواااااااا شوي وسائلكم بالله تقولون لي طلع نفس توقعكم وإلا

لا حسسوني أنكم متفائلين قصدي متفاعلين؟؟؟؟؟

طيب خلوني أقولكم السبب....

السبب أني كنت صاك على رجلي الباب ولاأنتبهت زاد كل ماجيت بأضغط

على الكلتش (معناها للنساء دواسة تستعمل للتغير أثناء تحريك القير)

أدورها ولا ألقاها وقلت يمكن أني ناسيها في البيت بما أني كثير النسيان

هالأيام لين أكتشفت أني مسكر عليها يوم وصلت...

يالله عاد إحراج تصدقون ماحسيت بالألم من الزحمات والحر وشذا

ياخييييييييي الرياض أستوى من الحراره باقي ننسبه (نغرفه في صحون

لأنه طبخ وأستوى)...

ومن شفت رجلي بغيت أنطلها أنواع الغبار والزلوغ (حروق) من حرارة

الشمس ياهي غدت مشوية...

المهم والناس تحببني وتصور معي وحمد لله على السلامه وأنا أستغليت

الفرصة وسئلتهم عن الساعة قالو لي عشر وخمسة وأربعين دقيقة (صح

عليك ياأم مالك) ولين باقي على موعدي ربع ساعة وأدخل العقارية لين

فيها تفتيش قلت بس شكلها الجوازات وأدور في مخابيي يمين يسار وعلى

الصدر أدور جوازي لأن المنظر مايوحي أني في الرياض...

والحمد لله طلع معي البطاقة قلت تنفع؟؟؟ وهز لي رأسه وقال ياخي ذي

تابعية ماهيب بطاقة ماتدري طلعوا ألفين نوع بعدها قلت لاتلومني مافيه

مواقف عند الأحوال وفيه سيارتين مرور مخصصه لمخالفة المراجعين

وبصراحه الحال مااااااش مامن دراهم نأكل بها عاد نسدد بها مخالفات...

المهم ويعديني وألقى ذيك النافورة زي شلالات نياغرا (تقع شلالات نياغرا

على الحدود الكنديه الأمريكيه وتبعد عن العاصمة الكنديه(أوتاوا) حوالي

650 كيلومتر حيث تقع خلف مدينة تورونتو وتسمى المنطقه الي فيها

الشلالات مدينة نياغرا وتعتبر من اجمل المناطق السياحيه بالعالم بالتنظيم

وجمال المناظر ويقابلها من الجهه المقابله مدينة بفالو الأمريكيه والتي ايضا

يعتبر الشلال الاصغر من ضمن اراضيها)...

المهم وأطب محيفره فيها بعد مافصخت ثوبي وأغسل رجلي وأقرى عليها

شوي لين بدى يرجع الدم المهم وأتفوط في شماغي وألبس ثوبي لين

مااااااااااشاء الله حرييييييييييم يوووووووووه مايتغطون ويلبسون نظارة

شمسيه ومزي السعوديات لابسين شئ أسود مزي العباية بس مظهراً كلش

كلش ماخلا مابقى وبماأني شيخ النظر ياني تمنظرت فيهن لدرجة أنهم بغوا

يتشفرون وينظافون للقنوات المشفرة بصراحه ذولي خطر على العزوبية...

وأنا من كثر التلفت بغت تنكسر رقبتي ذي تشدك بأنوااااع العطور وذيك

بلبسها هذولي ياخي لو انهم مسلمين على طووووووول للنار لأن عقاب

المتبرجه شديد يقولا أستاد التوحيد المتعطره زانيه والمتبرجه بيصب الله

عليها الرصاص فوق هامتها...

المهم لين الجوع لاعب لعبته فيني وأنواع الإستجداء والنحيب في بطني

وأقعد أدور بوفية وخلصت رجلي من المشي لين ماعاد بقى إلا إبهاميني

أصابع رجلي الكبار ولا لقيت غير دكاكين مكتوب عليها بالإنجليزي واقعد

أتهجا أتهجا أبي سي دي أي أف جي لين طلع معي فووووود وشهي ياشيخ

وشهي أيه لقيتها يعني دفس (ضرب) بالخمس يعني همي هم يعني آكل

وأقبل عليهم بنشوة المنتصر وأقول السلام عليكم لينه مايحكي عربي ويقول

تيس مصير(يس سير) قلت ينطح أهلك وأشر على فمي أبي آكل ويعطيني

صحيفة ناقصها عمل الطالب فلان فيها صور واجد وأشر على وحده وأعطيه

خمسة ريال ثم قعد يطالع فيني وأقعد أصفّر وأنا مدخل يدي في جيوبي ثم

عصب وقال (ثيرتي ناين) 39 ريال قلت ياخيييييييي خبزه بالجبن ماطلبت

نفر لحم ويجي ذاك الشامي وقال إزا ماعندك تكرم عينك أنا بأدفع لك...

قلت الله يعمي عينك وش تسعة وثلاثينه على أيش ويلتفت على ذاك الفلبيني

اللي داخله عيونه (من شبعة النوووووم) وقال سوري هي إز ستيوبد مايبي

(ماعليش الظاهر أنه أبله) عاد ستيوبد حافظها من مدرس الليليه من كثر

مايقولها لي وألقطه بحلقه وقلت ستيوبد جابته أمك ويوقومون ذوليك

البودي قاردات ويمسكوني وقالوا مش عاوزين نوسخ إيدينا فيك وينطلوني

برى المحل قلت مصيركم تجون السعودية وأربيكم ياعيال الكلب لكن الكلب

ماينبح إلا عند بيت أهله والله وكيلك وأروح والدموع في وجهي أدور

سعودي جاي مصيف في هالديرة عشان أستفزع به ولالقيت لين كلهم

أجانب والقهر مالين هالمطاعم ويأكلون وجبات غاليه والله أني ماأقدر أدفع

قيمتها خوف من الله يعاقبني على البذخ وأنا في عرض الريال...

وأجلس على كرسي جنب مطعم يسوي سندوتشات لحم بارد ويحط علية

زلطه (سلطة) مع كشتب ومازونيز ويبيعها بعشرين وهالناس طايحين فيها

عاد أنا تعوذت من الشيطان وقلت هذي تاليتها آكل لحم خنزيرررر لا وبعد

مليان بأنفلونزا الخنازير أعوووووووووذ بالله....

وتروح بي الأفكار لين وصلت لشروط مجلس التجارة والعولمه القادمه

وقلت عندنا في السعودية ملايين من هالأجانب وأهم شرط من شروط

مجلس التجارة العالمي هو تجنيس جميع الموجودين في البلاد لأكثر من

خمس سنوات يعني كلهم ويصيرون مثلي سعوديين ثم يجوني بعدين

يخطبون مني يالله الله لايجيب هاليوم مابزيناهم وهم بإقامات نبزاهم وهم

سعوديين والله لايشنعون فينا الشنايع وبعدين حلّوها عاد...

نصير كننا في الغربية ماينعرف السعودي من الأجنبي ولاتنعرف الخدامة

من عمتها وتصير الدعوة حوووووسة مير الله لايجيب هاليوم وأقوم

وأغسل وجهي في النافورة وأشرب وأروح لموعدي ومن وصلت قالوا لي

تعال بكرة اليوم المدير مش فاضي لك وقررت لو بأجي بكرة بأجيب عيال

عمي واجلد ذاك الشامي بس ياترى معهم البطاقات الجديدة عشان يدخلونهم

وإلا بيخلونهم على الحدود ينتظروني....

والسلام عليكم ورحمة الله وبركاته،،،

**شيخ النظر** · June 29th, 2009, 13:25

بسم الله الرحمن الرحيم

السلام عليكم ورحمة الله وبركاته،،،

سواليف متقاعدين في الدرة

أشوف متصفحته مغبرة...

يقولون زعلان...

زعل جدتي...

ليه جدتك زعلانه؟؟؟ من أيش؟؟؟

هذي قوله يقولونه يعني بلا رضا...

أهاه يعني جدتك مازعلت؟؟؟

لاحووووووول أنت من وين تفهم؟؟؟

مع نفس الطريق اللي تفهم منه...

ماهوب الظاهر!!!

ليه فيه مكان ثاني للفهم؟؟؟؟

هذا اللي أسئلك عنه!!!؟

ماعلينا نرجع لصلب الموضوع جدتك قلت لي زعلاااانه؟؟؟؟

ياأدمي لا بس هذا اللي مسمي نفسه شيخ النظر...

وش درااااك أنه زعلااااااااان؟؟؟؟

مبطي ماشفنا خرابيطه...

يمكن مريض أو مشغول وإلا عنده ضرفاً ما...

شهر دابل سبودنا ثم يختفي!!!؟

طيب وش مزعلك؟؟؟

ياخييييييي أشتقت له ولخرابيطه...

أهاه يعني متابع له...

من بعيد وبصمت عشان مايأخذ في نفسه مقلب...

طيب هذا هو أنقطع بأسبابك واشكالك...

وش تبين اسوي له؟؟؟

على الأقل أكتب تساءل في متصفحته وينك؟؟؟

وش معنى أنا ليه ماتكتب أنت؟؟؟

ياأخي ماني متابع له مثلك...

طيب وش أكتب؟؟؟ أخاف يحشرني بعدين بردوده الساخره...

ماتقوووول أنه مزووووح؟؟؟

متى؟؟؟

البارح من أتصلت عليك؟؟؟

وأنت صاير مثل بعض الأعضاء يدقق في كلش...

تقصد أبو مازن صاحب القلم الشفاف...

ليه شايف قلمه؟؟؟

لا ياخييييييييي من مداخلاته ومواضيعه...

طيب وش جاب ذكره؟؟؟؟

ياخيييييييي هو الوحيد اللي دايم يداخل هالشيخ لدرجة أحس أنهم أخوان...

عادي أخوااااااااااااان في الله...

يالله الله يجيبك ياشيييييييييييخ أشتقنا لخرابيطك...

آمييييييييييين....

والسلام عليكم ورحمة الله وبركاته،،،

**شيخ النظر** · June 29th, 2009, 13:26

بسم الله الرحمن الرحيم

السلام عليكم ورحمة الله وبركاته،،،

ولكن

خذني...

وين ماتبي...

المهم نسيني تعبي...

أي مكان...

غير الأماكن...

لأي زمان...

فيه الوقت ساكن...

مابي أكبر...

مابي أصغر...

كل شئ أبي...

ولكن...

ولكن...

مالقيت طلبي...

والسلام عليكم ورحمة الله وبركاته،،،

**شيخ النظر** · June 29th, 2009, 13:27

بسم الله الرحمن الرحيم

السلام عليكم ورحمة الله وبركاته،،،

برنامج مع الناس

لقاء مع سويّر بنت جويّر بنت جيرانا اللي نزلوا أولة لعام لما كانت في

سوق الرخوم تتسوق...

المذيع : لو سمحتي ممكن دقيقه...؟؟؟

سويّر : آسفه ماعندي صرف معك صرف ساعة؟؟؟

المذيع : لا يا أختي أقصد دقيقه من وقتك...

سويّر : أجل بعطيك من بيتنا أدري من وقتي بس ماعندي صرف...

المذيع : أحنا في برنامج مع الناس وحابين نسئلك ممكن؟؟؟

سويّر : بتطلعوني في الرادو وإلا التلفزيون؟؟؟؟

المذيع : في الأثنين...

سويّر : موافقه.....

المذيع : ممكن الأسم لو سمحتي؟؟؟

سويّر : سويّر بنت جويّر

المذيع : طيب من وين الأخت ؟؟

سويّر : للحين ماأدري بس أتذكر في دوله أسمها أكبر من مساحتها ومساحته أصغر

من عاصمتها كل ماحفظتها أنساها لأنها كانت تجينا في الأملاء والأبلا

حقت الأملاء غايبه دايم بالله إذا شفتوها قولوا لها أني إذا حضرت حصة

التدبير ماألاقيها سبحان الله هذي ماأدري وين تروح ( هذي وحده مالها

شغل بأي شئ بس سمعتكم تقولون دراسه قالت أصف معهم عشان التوبيس

يوصلها سوق الخضرة تشتري ماوس لأن الفرن الللي في غرفة النوم

مايشتغل) بس أني أتذكر أنها أغنى دولة في العالم والله اللي عالم لأن شعبها

على بند الأجور ويسكن العشش والجحور...

المذيع : في أي مرحلة أنتي ألحين؟؟

سويّر : الظاهر ترى مو أكيد توهقونا الظاهر أني في مرحلة الشيخوخه المبكرة

اللي دايم توصل فايتها الموعد زين ليه مبكرة ماأدري أعتقد أن قطار

العمر كان مليان قالت أأخذ ليموزين فجات متأخره ياحنينها...

الحتسي ماهوب علي الحتسي على اللي جايين بعدي ياهم بيشيبون ماشافوا

شئ من اللي شفته...

المذيع : في أي صف؟؟

سويّر : في الصف اللي تدرسه فيه حصه بنت جيرانا قبل لاينزلون لأني كنت أروح

معها بس بعد مانزلوا عيوا أهلي ننزل جنبهم لأنهم نزلوا جنب المدرسه

اللي تدرس فيها هياء بنت جيرانهم وذيك المدرسة ماسددوا الإيجار

وطردهم راعي المكتب وباع ماصاتهم في الحراج...

المذيع : هل تحبين المدرسة؟؟ وليه؟

سويّر : أكيد أحب المدرسه لأن فيها المقصف اللي يبيع كل شئ ببلاش ومع أرتفاع

الأسعار صار يعطينا فلوس عشان نشتري من البقاله اللي جنب المدرسة

إلا على طاري المدرسه وين كانت فيه؟

كل مارحت لمدرسه يقولون جيبي ملفك لدرجة صارت إدارة التعليم تعرفني

وصرت مشهوره موتي قهر ياحصيص ليه تنزلون من جنبنا...

تعال عندي سوعال ليه المدارس الحكوميه كلها أجانب والأهليه سعوديين؟؟؟

المذيع : أنا اللي أسئل وأنتي تجاوبين يالله قولي ليه؟؟؟؟

سويّر : عشان المدارس الحكومية مدرسينهم سعوديين والمدارس الأهلية أجانب

وعشان يصير خلط عصير مشكل من الثقافة واللي يبي الإمتحان يحول

لحسابي الجاري في اليابان...

المذيع : ما هو أحلى يوم في الاسبوع عندك؟؟

سويّر : كل الأيام حلووووة خصوصاً في عطلة الصيف لأن البرد قارص مركب

ضروس حيه والدراسه المسائيه خلص التسجيل فيها لأن الدراسه الصباحيه

فصلوا كل الطالبات فقالت المديره للأبلات وش رأيكم نخليها عطله قالوا

مادامنا مشغولين بالحش في خلق الله عطله أحسن وأحسن عشان يفكون

أبوي من الطلبات لأنه مسكين مطفر وزادوه هالمدارس...

المذيع : في أي مدرسة؟؟

سويّر : قبل ماتنزل حصيص وإلا بعد؟ ناقص ترقمني على الهوى...

المذيع : ما هي المواد إللي تحبينها؟؟

سويّر : الفسحه لأن الأبلات يجيبون سندوتشات جبن وأنا أحب سندوتشات الزعتر

مرررة والهده (الطليعه) لأننا نعرف الأبلات المتزوجات من العوانس

ونفسر أسباب أرتفاع مؤشر سوق الأسهم اللي جنب أشارة قف اللي في

الحارة اللي ضعت فيها...

المذيع : لك مواقف طريفة أو حزينة صارت لك في المدرسة؟؟

سويّر : أصلاً ألعب عليكم ماكنت أدرس لأن حارتنا كلها مدارس أهليه حتى

التحفيظ ماقبلوني لأني كنت أميه ولاعندي عيال طيب وشلون أم100 وأنا

توني ماأعرست أصلاً ياربييييييييييييييييييييه تعبت وأرتحت قبل أتعب

بشوي...

ماعليش سامحوني صحيح أني ماتعلمت مثلكم بس ترى خدامتنا جايه

تشتغل عندنا عشان تصرف على عيالها اللي يدرسون وين فيه وين فيه وين

فيه ياربييييييييييييييييييييييه أيييييييييه لقيتها في ديرتهم...............

تحملوا توهقكم فيني دخلت سكه سد ووراي البسينه (القطوووووه) قلت

أدخل عليكم عندكم مكياج ماركة برت بلس؟ وإلا ديو شراب اللي شعورهم

تخرب من الدعايه وشلون تقفلووووووووووون الموضوع

أعتبروني ضغت الزر اللي عليه علامة تلفون أحمر يعني خلصت

أدري بتقولون لي دوختينا

بس أنا ودي أسئل كان مع الدوخه شئ ثاني مثلاً كرهتوا أحد في المنتدى أو

نفسك تهفك على أكل معين مع إستفراغ أثناء الطبخ إذا كانت الأشياء هذي

تحصل ترى شئ جميل معناتها أنك إنشاء الله قربتي تعرسين لأن خالة

جدتي كانت عندها نفس الأعراض فسافروا في الصيف حتى بعد أنا سامعه

أن وحده صينيه ساكنه في اليبان تشتغل في سنغافورة كان عندها نفس

الأعراض ولا صار لها شئ سبحان الله فيه تشابه كبير بين الخس

والطماطم لدرجة أن الباذنجان يغار من البطاطس أيه الله يعين حقين

البروستد ماعاد يقدرون يسون مندي لأن الزيت غلا وأصلاً مانيب أحب

أكل البقالات لأنه يجي في قواطي وعلى طاري قواطي كني اسمع في

الرادو أغنية الجوهر ماعادهوب جاي طيب بالله منهو اللي ماعادهوب

جاي؟

لاتلوموني مليت الصمت قلت أنوم مبكرة عشان أصحى عقب باكر يمكن

الوضع تغير في هالديرة بلششششششش على من نكد علينا في حياتنا...

والسلام عليكم ورحمة الله وبركاته،،،

**شيخ النظر** · June 29th, 2009, 13:28

بسم الله الرحمن الرحيم

السلام عليكم ورحمة الله وبركاته،،،

انتحار

عشرون مترا تفصله عن القطار القادم وهو لم يتزحزح عن

مكانه وسط السكة الحديدية !..

عشرة أمتار..لم يبرح مكانه ..

خمسة أمتار..

ثلاثة..

اثنان..

واحد..

بووووووووووووووم....

لا لا لا لا مرّ القطار بسرعة البرق بينما بقي جامدا مكانه ..

لحظات بعد ذلك قام في هدوء ثم مضى وجثة حيوان صغير

تتدلى من بين فكيه يبدو أنها لفأر كادح!!!!

والسلام عليكم ورحمة الله وبركاته،،،

**شيخ النظر** · June 29th, 2009, 13:29

بسم الله الرحمن الرحيم

السلام عليكم ورحمة الله وبركاته،،،

عادة

نصبوا على الواطي (المواطن) أول مرة، فرفع شكواة إلى القاضي الذي أكد

له بأن القانون لا يحمي المغفلين

وهكذا صاروا ينصبون على الواطي كل يوم!!!!

والسلام عليكم ورحمة الله وبركاته،،،

**شيخ النظر** · June 29th, 2009, 13:30

بسم الله الرحمن الرحيم

السلام عليكم ورحمة الله وبركاته،،،

مجلس الشعراء

كل فرد منهم يملك سيارة فاخرة يتبعها عشرون سيارة إضافة كل واحد منهم

يمتلك شركة ليموزين تحوي ألفي سيارة على الأقل...

عقد الشاعر اجتماعا عائليا فجاءوا جميعهم متأخرين وأرجعوا السبب إلى

ازدحام حركة السير عندها قال لهم :

هذه مشكلة يعاني منها المواطنون،سأطرحها اليوم في مجلس الشعراء كي

يناقشها في الخطة الخمسة عشرية القادمة...

والسلام عليكم ورحمة الله وبركاته،،،

**شيخ النظر** · June 29th, 2009, 13:30

بسم الله الرحمن الرحيم

السلام عليكم ورحمة الله وبركاته،،،

هم الشـعب

كان يامكان في سالف العصر والآوان دويلة صغيرة وجدوا فيها الوالي الذي

حكم البلاد لفترة طويلة مقتولا فجرَ أحد الأيام...

بحثوا عن قاتله ولما لم يعرفوه فأشاعوا :

قتله هم الشــــــــــــــعب...

والسلام عليكم ورحمة الله وبركاته،،،

**شيخ النظر** · June 29th, 2009, 13:32

بسم الله الرحمن الرحيم

السلام عليكم ورحمة الله وبركاته،،،

مطوع الحارة 3 الأخير

من رجعت من الدوام وألقى ابو نايف قاعد يحتريني ومعي كرتون صحه

بخلطة الزعفران وأعطيه بطل بعد ماتفقدت الشارع لايكون مسويين لي

كمين ومن باكر جايب لي عشرة ألآف وإبتسامته واصله اذنيه ويقول نبي

عشرة بطول بس تكفى نفس الوزنيه لأني أبشرك الضيقة راحت وأم نايف

نامت نومة جدتي..

وأشهق في وجهه عسى مامتت

قال الله يسمع منك...

قلت لاياخييييييي لاتورطنا حرام عليك...

قال وش أورطك حرمتك وإلا حرمتي...

واطق على كتفه لاياأبونايف حرمتك بس أم نمر بتقعد في حلقي (وأنا أنفث

أوووووووووف مابغيت أصرفها)...

قال عندنا وعندك خير المهم لاأوصيك الله الله في التوصي في القراية...

قلت أبشر بس ترى الشيخ يمكن بيسافر يقرى على إيران يهجدون شوي من

رجّتهم في الخليج وإحتمال يطول إذا عندك احد منقطع أستعجل علينا...

قال لا ياشيييييييخ...

قلت شكلك ماتتابع قناة المستعمره!!؟؟؟

قال ليه وش صاير أنا من بدتني الضيقة وأنا ماعاد أتابع شئ ماغير كني

أياك في الدرة أشطب وأكتب في وصيتي لين جبت لنا قرأية هالشيخ

المبروك...

قلت تصدق عاد أن اسمه مبروووك...

قال والله أنه اسماً على مسمى(ربعنا يعجبونك يسهلون لك طرق النصب

عليهم)...

والآن بعد توالي الطلبات علينا نعلن الآتي...

تعلن مقرأة الشيخ مبروك الله يبارك في الجميع عن وجود الشواغر الآتيه:

وظيفة قارئ خارجي للقرأة على العماير...

وظيفة قارئ بري للقرأة على الأبل والأغنام...

وظيفة قارئ تجاري للقرأة على المشاريع التجارية...

وظيفة قارئ مسعبلاتي للنفث في وجيه طلاب القرأة السبيشل...

وظيفة قارئ مدني للقرأة على المدنين...

وظيفة قارئ عسكري للقرأة على العسكريين...

وظيفة قارئ نسائي للقرأة على الرجال...

وظيفة قارئ مفحطاتي للقرأة على التريلات ومجانين السرعة...

إضافة لمساعدين من الشباب العاطل اللي عضلاتهم واصله أذنيهم للتعامل

مع الممسوسين...

ترسل السيرة الذاتية على فاكس

00000000000000000

أو إيميل

Keeked-sheikh@ alqumaa.net

القمة الساحة العامة يوميات شيخ النظر

والأفضلية للمتسعودين لأن معظم السعوديين زبائننا

مع إقامة قابله للتحويل

كما يسرنا أن نعلن لكم بمناسبة حلول فصل الشتاء

أن نعلن لكم بقرأئتنا على العروسين...

والقرأه الجماعية على فرق السامري والخبيتي والمزماااار (لأول مرة بالعالم)

كما يسرنا القرأه على الطرق السريعه لحفظكم من العين بأمر الله اثناء

سفركم في ظل هذه الأجواء الماطرة...

كما يسرنا القرأه على المحافظات لحفظها بأمر الله من المحن والكوارث...

كما يسرنا الكشف عن قرأية السعادة التي تخليك تضحك اربع وعشرين

ساعة وبدون دموع (شمبو أطفال ماهو قرأية)...

كما يسرنا أن نعلن للأندية الرياضيه التي تعاني من إصابات لاعبيها ولم

تتمكن من الحصول على الأربع بطولات بقرائة على الملاعب...

كما لايفوتنا القرأة على المنتخبات لتتمكن من الحصول على البطولات...

أيضاً قرأة على يدين النساء الذين لايعرفن الطبخ...

وقرأه على ملابس الرجل كي يكون مثل الخاتم في يديك...

الكمية محدوده

ومن صرت مطوّع الحارة وأنا ناوي اشتري قصر في شرم الشيخ عشان

أقرى على السيّاح بعد ماشريت أربع قصور في الرياض ومثلها في

الشرقيه والغربيه والجنوب...

وناوي اطلع امريكيا عشان استنسخ مني 100 واحد عشان أوزعهم على

أرجاء المعمورة كي أتمكن من القرأة على الناس في نفس الوقت ومن

مطوّع الحارة إلى مطوّع مجرة درب التبانه...

والدعوة صدري منتك وهو مايصلي والآخر ماينام وهو شارب قهوة وشاهي

والثالث نسى التفاؤل وعايش التشاؤم وكل اللي عليك تعرف نفسيات الناس

وتتعامل مع عقولهم لأن خير القرأة بالقرآن الكريم الذي هو شفاء للناس

تكون بنفسك على نفسك مع تحصين نفسك بالأوراد اليومية هذا والله أعلم...

والسلام عليكم ورحمة الله وبركاته،،،

**شيخ النظر** · June 29th, 2009, 13:33

بسم الله الرحمن الرحيم

السلام عليكم ورحمة الله وبركاته،،،

كويتي

تحياتي للشعب الكويتي المتمثل في أبناء عمومتي الله

يمسيهم بالخير والحاضرين على طيب القلوب وحسن

الكرم والضيافه حبيت أشكرهم بالكلمات الآتيه وشاكر

لهم متابعة متصفحتي المتواضعة...

هلا كويتي...

عيونك دنيتي..

وقلبك بيتي...

هلا كويتي....

أبوصفك نيتي

وأنتي تماديتي...

كل الهلا تحيه

تزف قليبي بيديه

ديار الحب كويتيه

هلا كويتي

وين الطيب بدونك

وين الفرح بلاك

ياللي الدنيا عيونك

كل المجره غلاك

في القلوب وحدك

ماأحد ياكويتي معاك

غير العز ومجدك

كل الهلا تحيه

تزف قليبي بيديه

ديار الحب كويتيه

هلا كويتي

كل الكويت

بيت بيت

ترسم الطيبه قلوب

وكل الكويت

من أصبحت لأمسيت

تشرح الخاطر دروب

أتبخر في نهارها

وفي ليلها أذوب

دار الطيب يادارها

كل الهلا تحيه

تزف قليبي بيديه

ديار الحب كويتيه

هلا كويتي

والسلام عليكم ورحمة الله وبركاته،،،