يوميات شيخ النظر

**شيخ النظر** · April 14th, 2014, 19:47

ياولدي قم توضى

والله متوضي

طيب قم صل

والله مصلي أجل وشلون متوضي!

طيب ذاكر

والله ماعلينا شئ

الله يصلح هالولد من أنولد وهو متوضي ومصلي ومن دخل المدرسة وهو مذاكر ماناقصة بسم الله عليه

غير يكون أبو لنفسة من كثر مايحس أني محوم كبدة بتكرارنفس اﻷسئلة عليه يوميا اليوم أصبحت التربية تحاور

والصدق غالباً ماتنتهي مناقشتي مع هالعيال بأي شئ يطير حواليهم وهم يقولون ماعندك إلا الترجيم!!!

**شيخ النظر** · April 16th, 2014, 10:26

ثوبي مشقوق

شيخ : يا يبه ثوبي مشقوق وأنت دوم تتجمل مع الناس وتخيط لهم ثيابهم وللمعوزين ترقع لهم ثيابهم ليش يابابا تظلمني وياك!؟

أبوي الخياط : أقول ياولدي وش عرفك أنت؟؟؟

شيخ : ومالوا فهمني ولو أنك على قدّك في كل شئ!؟

أبوي الخياط : صدق أنت ولد ماتستحي ولاعرفت أربيك دواك أني أخيط فمّك مش ثيابك عشان تتوب تتكلم مره ثانية...

شيخ : نزلت دمعتي والمخرج سوى فوكس على وجهي وشغل صوت ناي على الوتر الثقيل عشان يبين المشهد أشد قسوة وحزن... ياحليلي ماتربيت؟؟؟ ياحليلك ماعرفت تربيني؟؟؟

الناس كلهم يضحكون علي ويقولون ولد الخياط ثوبه مشقوق وأنت للحين مافكرت على الأقل ترقعه مش تفصل لي ثوب جديد؟؟؟

أبوي الخياط : أنا لو فصلت لك ثوب جديد أو على قولتك رقعت ثوبك كان الناس ماخلوني في حالي وقالوا فاتح محل عشان يفصل لعياله ويصلح ثيابهم...

شيخ : تخاف من الناس ولاتخاف من الله؟؟؟

أبوي الخياط : ياولدي كانو الدروز يقولون الرجل يتوب لما يوصل الأربعين لكن أنت شايف في السوق كل التجار فوق الستين ومازالوا في هواهم ضايعين وحشراً مع الناس عيد....

شيخ : أعتقد الستين سن التقاعد وإلا؟؟؟

أبوي الخياط : هذا في المولات أما في الأسواق الشعبيه سن التقاعد مفتوح يمكن تخرف وتبقى مثل ماأنت مادمت صاحب صنعه وحتى لو مت ممكن تعلم أولادك لأجل يورثون حرفتك...

شيخ : يعني التجارة وراثه واللي يبي يبداء من جديد؟؟؟؟

أبوي الخياط : مافيه أمل يخلونه التجار إلا يتعاونون عليه لحد مايكسرون ظهره ويطردونه من السوق...

شيخ : أما هالتجار مافيا طيب يابابا وش رأيك تعلمني الخياطة على الأقل أرقع ثيابي؟؟؟

أبوي الخياط : طيب ومن وين أجيب لك مكينة؟؟؟

شيخ : على نفس هالمكينة أشتغل...

أبوي الخياط : أقول قم فارق لاأصك عليك في القبو أهون يقولون ولد الخياط ثوبه مشقوق ولاورثه حي...

**شيخ النظر** · April 16th, 2014, 10:32

سوالف مخي وأنا على المخدّه

عيالي ما ياكلون...

خذتني وانا صغيرة ولعبت علي...

انا من قبل كنت مزيونة و ضعيفة بس الحمل والولادة خربوا جسمي...

ماأحد في البشر يصبر صبري عليك وعلى عيالك ولاأحد تعب مثلي في هالبيت...

كل ما رحت لعرس خطبوني...

أي أحد يشوفني يقول توك صغيرة شكلك مأخذته على مرأة قبلك...

محد يصدق أن هذي بنتي يفكرونها أختي...

الخدامة للتنظيف مالها خص بالعيال ولا الطبخ...

لي يومين ما نمت إلا ساعه...

ما في حرمة ضحت زي ما ضحيت...

ما أحب الكلام الزايد أبد أبد...

ما في حرمة تصبر على ما صبرت عليه...

كل الحريم يعرفون من هي فلانة...

من يوم أنا صغيرة وأنا بعقلي وربي لك الحمد...

ما شفت خير من عيون الناس والحسد...

كل الناس يقولون سبحان الله عيالك مايشبهونك أكيد يشبهون لأبوهم ولأهله!

مافيه إلا هالصغيرة اللي يقولون فيها لمحه مني...!!!

أنت لين الحين مازادوا راتبك...!؟

ياموت قلبك كل ماجيت أسولف معك ألقاك تشخررر

**شيخ النظر** · April 16th, 2014, 11:18

أبسئلك ياللي تقراء أيه أنت أو أنتي!؟

......

لاتنفص عيونك أيه وإلا لا!؟؟؟

نعم وش عندك!؟؟؟؟

بالله عليك ليه عاقد حجاجك!؟

............

توك مصبح !؟

...............

عادي الورود تتفتح الصباح وتنتشي منها أجمل الروائح...

حتى أنت!؟

طيب سكر فمك (تراه أذن) والله يالروايح اللي تطلع منك صباح تذبح الورود...

بالله!؟

صدق بعد على شين ريحتك ماتبتسم!؟

وأنا وش دخلني!؟

ياعزيزي أنت تقراء وناسي أن وجهك ينعكس على الشاشة...

طيب!؟

يعني أنت تقرب للشاشة وهي تبعد لا بعد ومن زود الغثاء مكشر...

الظاهر أنك فاضي وتحسبني مثلك!؟

بسم الله عليك تصير مثلي ياأخي أنا آخر مرة أبتسمت وأنا أكتب لك الآن...

يعني أنت شايفني طيب عشان تحكم..!؟

بدون ماأشوفك واضح من شكلك أحس أنك شايل وجهك بالقوة اليوم لدرجة أن خشمك وده يطيح في مخباك!!

والمطلوب الآن أضحك!؟؟؟

هههههه ياعمي تضحك مين إذا أنا عشان تبتسم حسستني بالحسرة على نفسي من كثر ماأحايل فيك عاد كيف لو أبيك تضحك يبي لك طولة بال زي مشروع إسكااان...

**شيخ النظر** · May 5th, 2014, 02:54

الحرف في شفاهك
يسكر ثم يفيق
والوصف
أستعبدته
ثم عتقته
حر طليق
ياللي سلبه أنتباهك
تاهك...
وأصبح بسلامتك غريق
شيخي
من كان الحدث تاريخي...
كان شعبك العريق
مشغول بك عنك...
ومشغول عنك بك
في نبراتك..
قمة التشويق
لسانك ماأخطا
بس!
قلبك من أعطا
حبك
سمى شعبك
أخو شقيق...
فينا وفينا...
وأوفيتنا...
يابومتعب
بحبك وفينا
وأحتفينا...
ياسعتنا من الضيق
في حضرتك...
جلستك بين أخوتك...
ناديتنا بالشعب الشقيق...
وأحنا...
عند هقوتك
وش ماسميتنا...
علينا يليق...
فدينا كلمتك..
وطن أتحد..
وذاب وأصبح لك الريق

**شيخ النظر** · May 5th, 2014, 03:17

أصعب شئ أنك تحاول تكون شئ يحبه الآخرين
وتنسى تكون الشئ اللي تحب تكونه أنت
الحياة جنون فكر في أوقات كل ماحولنا هادي
والمشكلة شعورنا بالضجر من متاهات صنعناها كقيود لأنفسنا

تصور أن الورد شايلك ويقدمك للورد تتوقع أيش بيقول عنك!؟
هذا أنسان آخر مرة تبسم قبل أسبوع!!!

طيب تصور أن المراية تقول لك يافلان آخر مرة شفت أسنانك
لما أكلت لحم وعقب قعدت تنكشها با(toothpick) عود الأسنان
عادي أنا أعرف ناس الداينتست طبيب الأسنان هو اللي فاجائهم
أن عندهم أسنان وإلا مايدرون!!!

كتب لصديقة وش رايك نأخذ عمره!؟
رد عليه وقال مايأخذ العمر إلا اللي عطاه!!

اكثروا من قول :
"لا إله إلا أنت سبـحانك
إني كنت من الظالمـين "
فإن أولها توحيد
و أوسطها تسبيح
وآخرها استغفار
((ذكّر بها غيرك))

اللهم صل وسلم على سيدنا ونبينا محمد وعلى آله وصحبه

**شيخ النظر** · May 5th, 2014, 02:58

ربي في هالليل الأصم لايسمع مافي قلوبنا سواك
فاللهم أنصر الإسلام دينك والمسلمين آمين

**شيخ النظر** · May 5th, 2014, 03:30

من أملح ماوصلني في الواتسب خصوصاً أنني أعاني
أحياناً في المسجد خصوصاً صلاة الظهر

شايب حاااااار عصبيييييي
قام عقب صلاة الظهر وقال للجماعه هالكلمه

‏بعض الناس ودك تمسك آصبعه،
وتشقه بآلسكين نصين
ثم تكب بوسطه ملح
ثم تعصر عليه ليمون
وتغطسه بكوب اسيد وفلاش
ثم تحزم اصبعه بليفة صحون وتفركة وتفرك وتفرك،
ثم تحط اصبعه على زاوية الباب
وتصك عليه الباب 100 مرة ،
وتجيب يد نجر هاون وتثبت اصبعه على سندان حديد
متروك في الشمس من الصبح وتدق اصبعه دقققققق
لين يغدي أصبعه مسطح مثل السكين اللي قسمته نصين
ثم تقوله :
شفت هذاااا
مكيف المسجد لا..... تطفيه !
المكيف وشهو له؟؟
تتلقف وتطفففففيه
تسمممممع لاتطفيييييه
فاهم ؟
لاتطفييييه !؟

اوجعني اصبعي وانا مالي دخل

**شيخ النظر** · May 5th, 2014, 03:42

من أراد أن يبقى في حفظ الله ومصونته فل بصلي الفجر في جماعة
فإلى الصلاة يامن أحببتكم في الله ولاتنسوا أخواننا المسلمين من
الدعاء الأحياء والأموات

**شيخ النظر** · May 6th, 2014, 03:44

قروب واتس أب عائلي

فجاءة
جوالي قام يصارخ
قلت لايكون ألتمس من الديم في البر
رقم خرافي على الشاشة ظنيته مكالمة لم يرد عليها!!
سحبت على الرقم لليمين فتح علي صور عزيمة
تبسمت قلت من اللي عازمني!!!؟
وفي لحظة تساؤلي أشرقت لي صور نمر وأبوجاسم

عيالي !؟
عيال النظر في محياهم أبتسامة غد مشرق
تبسمت وأنا أنتقل بين الصور وأسترجع الوجيه...
كلهم يتشابهون على الأقل DNA واحد متوارث جينيا...
صافحت عيوني جماد
ياحليلة ذاك الوليد قبل امس كان يكلمني ثم راسلني وماتكلف دعاني!!!
ياحليلة نساني!!
وعن الكذب في آخر السوالف
كتب لي خلنا نشوفك
قلت في نفسي مايخالف
حبيبي أنا أسف
توي قريت حروفك
هذي صجة أمس
صور صور
وهذره عن هلال ونصر
واليوم يادوووب خمس ست رسايل
عن وعن ومن ومن
وبكره القروب خامل
ولا أحد عن أحد سائل
Left left left
ياقلبي شفت
هذي أخر المجامل
تبسمت وأنت بعد ياللي تقراء تبسم يمكن تزين مع قرب إجازة الصيف وشوية تفائل
ذولا ربعي وجماعتي مصورين جمعتهم البارح ومنزلين الصور في القروب ولاني الكبير ولا الصغير بس طرى لي حرف قلت أكتبه وأنام
سلام من الله عليكم ياقرائي الكرام