يوميات شيخ النظر

**شيخ النظر** · June 28th, 2009, 06:44

بسم الله الرحمن الرحيم

السلام عليكم ورحمة الله وبركاته،،،

يمنع الوقوف أمام الباب...

كل البيوت في الحارة واضعه على أبوابهم الكهربائية لوحة (يمنع الوقوف

أمام الباب) ونظراً لأن الجيران أجاويد ويعرفون أم نمر ويودون عيالي مع

عيالهم المدارس إذا صار دوامي صبح فأنا أحترم فيهم هذا الشئ (الدنيا

مصالح) المهم إذا كان دوامي مسائي اللي هو العصر ألقى عيالهم موقفين

سياراتهم قدام بابي وبصراحه أنا أخاف أوقف الونيت بعيد لاينسرق وإلا

يمشخونه هالبزران...

فأضطر أوقف الونيت على الشارع العام وأجيك مشي والغبنة في بعض

الأحيان ألقى اللي واقف مشى ولو كنت واقف أحترية مامشى لاحول ولاقوة

إلا بالله...

وأنا في هذا الحي أنسان مايجيني أحد ولاأستقبل أحد معه سيارة لأني ساكن

في شارع عشرة (والله من زين تخطيط المدن عندنا أحياء حديثة ترخص

بشوارع عشرة) ولو جوني أثنين بسياراتهم راح يضطر الجيران يجون على

ليموزين للبيت فلذلك أنا معلم الناس اللي يبيني يدق علي من الشارع العام

عشان يوقف سيارته ونجي نتمشى أنا وأياه للبيت عندي...

والبارح جيت بأوقف ولالقيت موقف الساعة إحدعش ونص في الليل وقلت

بألبق في الشارع العام لأن البارح كان فيه مباريات الأتحاد الأوربي

(الظاهر) لأن السيارات شبابية جاين عند جارنا أبو سامي لأن ولده راشد

كان مبتعث لأمريكيا ورجعوه عشانه يحب النوم ولايحضر كليته المهم

هذولي أصدقاء أخوه أكرم اللي عاطل ويمووووت في شئ أسمه أكس

بوكس (زي البلاي ستيشن)...

وأجيك أسحب رجيلاتي لين وصلت البيت وأبي أفتح الباب وأثري ناسي

المفتاح في السيارة لاحول ولاقوة إلا بالله...

وأروح أجيبه وأجيك منهد أبي الرقاااااااااد ومن غيرت وتحممت لين

الفراش (يسألني وينك ياقاطع صار لنا مده ماشفناك) (شاريه من الغربيه

هالفراش)...

وأقوم وأسوي حركه بهلوانيه لين رأسي على الديكور الخشب

وأححححححححححححح وش ذا أحسبها أم نمر لأنها معطتني من أطلع من

الدوام لين أرجع 45 دقيقهفبما أني تأخرت 7 دقايق في روحتي أجيب

المفتاح فتوقعتها كانت حاسبتها المهم الضعيفة كانت نايمه وأتلفف لك في

ذاك اللحاف أستعداداً للموته الصغرى وبمجرد مانمت إلا أنا على طريق

الشرقيه عام 1408 رايحين أنا والشباب وكان عبيد يرقص وسلطان يطبل

له طالعين بداية الصيفية للبحر ووقف عبيد عن الرقص إلا سليطين يطق

بقوة أمه وأبوه لاحول ولاقوة إلا بالله...

وأتوعى إلا الباب ينطق (طق مداهمه) طقطقطقطقطقططقطققققق خلصت

(جراكل المويه) وأفز من النوم بسم الله الرحمن الرحيم وأطلع بسروال

السنه وكريشتي تقول لي أتبعني...

مييييييييييييين إلا ذا اللي يصايح الساعة ثنتين أفتح ياللي فيك مايخطيك

يالفاعل يالتارك...

وأفتح إلا يلقطني بحلقي لين شق الفنيلة ويجرني قدام عيالي (أهي أهي

دموع مع خلفية صامته تستعرض أيام قوتي من كنت أصفق عيال

الحارة)...

وقال ماتعرف تقراء ياغبيييييييييييي ياأبله قلت إلا ومشترك بعد في الدرة

ولي يوميات قال أيشششششششششششش قلت لاأبد سلمك الله قال أقر لي

هاللوحه وش مكتوب عليها قلت مايحتاج زاقطني بحلقي عشان أقراء لك

اللوحه فكني عشان أقرأها قال لا أقرها وأنتي تحت يدي قلت لاحول ولاقوة

إلا بالله (يؤؤؤؤؤؤؤؤؤؤؤؤ منع الوقوف أمام البااااااااااب) صرت أتأتي زي

أبو عبدالله...

قال طيب ليه توقف قدام باااااااااااااااااابي قلت ماوقفت قال هذي سيارتك

ولاأحد عنده قرنبع إلا أنت (قلت في نفسي سابقاً بس بعد ماأشتركت في

الدرة أرتفعت قيمة هالسيارات كل الناس تتميلح يبون يضنونهم الناس

شيخ النظر) ولين هذي بخطوط وأنا بعد غسيل التكارنة مسحو الخطوط...

قلت لا ياأخي والله العظيم جعلي أمووووووووووت كل سنة أنها ماهيب

سيارتي ويطلعون من بيته ثلاثة مع الظلمه تحسبهم جن من الكشش

ويركبون السياره ويمشون والنذل يدزني في الشارع ويصك بابه ويدخل

وأجي بأدخل بيتي وألقى الباب مصكوك وأطق وأطق وتطلّع لي أم نمر ورقة

مكتوب عليها (((نم عند اللي كنت سهران معهم لين ذا الحزة))) وأروح

لسيارتي وأرقد فيها لين الصبح.....

والسلام عليكم ورحمة الله وبركاته،،،

**شيخ النظر** · June 28th, 2009, 06:50

بسم الله الرحمن الرحيم

السلام عليكم ورحمة الله وبركاته،،،

أعطالة

أمشي…

وأنا خلفك أمشي…

ورمشي…

مايرمشك…

ساهر على راحتك…

وش يدهشك…

الساحات ساحتك…

وأنت من يومك غالي..

لكنك ماتبالي…

باللي يغليك…

الله الله…

أيه من تالي…

يوم أن ربي معطيك…

سيارة جخ وبيت...

وش تبي بي...

ياراعي الونيت...

بس تقطع قليبي...

أمش...

بس أمش...

وأنا لو تعطلت...

لي الله...

ولو عليك طولت...

لاتخاف...

بأشوف لي ونش....

موتري...

تعود على الصناعيه....

عاديه...

أعطالة عادية...

ياكهربائيه...

ياميكانيكيه....

حاجه عادية...

أحياناً يوميه...

وأنا أصلاً ساكن في الصناعية....

والسلام عليكم ورحمة الله وبركاته،،،

**شيخ النظر** · June 28th, 2009, 06:58

بسم الله الرحمن الرحيم

السلام عليكم ورحمة الله وبركاته،،،

أصول الشحاذة

الظهر في مدينة الرياض حااااااااااااااااااااار جداً أسخن من صحن أكل هندي

محمل بجميع أنواع البهار الحراق والفلفل النعجاني الأصيل دقت علي أم

نمر تقول نسيت تجيب كيس ثووووووووووووم لأننا جايبين من الشرقيه

سميكات ولقيت في كتاب أم راشد في طبخ المعاند وصفه تهبل بوضع ربع

كيلو سمك مع ثلاثه كيلو ثوم وحبحار وكيس فلفل أحمر مطحون مع أثنين

لتر زيت مرض تباع الشمس مع اربعة الواح من الزبدة و19 علب حبحر

وكل شئ موجود ماعدا الثوووووم لاتنسى الله يخليييييييييييييييييك وجب

معك لفتين قصدير وكيس فحم صغير (ناوية تسوي شيشه الظاهر)....

وأتفطن مخابيي لين أبوعشيش وخفافيشش فيها وأتذكر باقي في الحساب

مية ريال وأروح عند أقرب مكينة صراف وأنا مشغل أطراف الشماغ كنها

مسحات سياره بس لوجهي من الحر...

وبمجرد ماوصلت بصراحه أرتبت لأني لقيت واحد من ربع تفكيك القنابل

الخوجات اللي يتعامل مع مكينة الصراف كأنه يسولف مع مخلوق فضائي

عاد اللقاااااافه ذابحتني من تالي أبي أعرف وش يسوي ومن ورى القزاز

أتابعه وينتبه لي إذا رحت يمين حط كتفه اليمين وإذا رحت يسار حط كتفه

اليسار رحت نزلت الأستبنه (أسبير الكفر) قلت بأشوف من فوق وش

يسوي؟؟؟؟

قام لحف المكينة بشماغه ودخل راسه فعرفت أنه قاعد يسوي عملية

قيصرية فجلس برا رايح جاي أدعي الله أنها توضع بالسلامه...

المهم وصارت المكينه ماهيب حامل وطلع أبو الشباب يناظر لي بعيون تقدح

شرار وقال (لابو البنك اللي عطى أشكالك بطاقة صراااااف) قلت ليه واقف

قدام مراية الأخ؟؟؟؟؟

المهم واسحب هالمية وتوي بأركب سيارتي إلا ويوقف جنبي واحد معه

لك أسسز470 آخر موديل لابس غترة بيضاء ومشخص ريحت الكمبودي

ودهن العود تفوح منه ونزل وسلم علي على طول حبيت كتفه ووقفت كني

عسكري أنجليزي عند قصر أليزابيث وقلت سم طال عمرك المهم ويزوي

وجهه وقال أخوك عابر سبيل (قلت تكتب في الدرة؟؟؟) قال لا قصدي مسافر

(قلت هذا النك الثاني حقك اللي كشفته أم مالك) قال لالالالالالالالالالالالا

ياخييييييييييييي عطني فرصة قلت لا أسحب صندوق الجماعة (مونوبولي)

قال ياآدمي أنا جاي من أرض الرسول صلى الله عليه وسلم المدينة المنورة

قلت ماشاء الله وشلون مسجد قباء والحرم في هالإجازة قال بخير وشفيك

أنت سكراااااااااااان قلت لا طال عمرك بس مفوررررررر أديتري من

الشمس المهم وش تبي؟؟؟

قال بصراحه خلصت فلوسي ولامعي أرجع للمدينة المنورة قلت الله يكون

في عونك قام سرد آيات وأحاديث الصدقه لدرجة أني حسبته فقيه...

المهم قلت معارض السيارات ثاني أشارة يمين بع هالموتر وأشتر لك بيت

في الرياض والباقي أفتح لك به مشروع قال لا ياشيخ قلت وش دراك

بأسمي مكتوب على جبهتي وإلا لمحته من البطاقه اللي مشخص بها في

الجيب القدامي عشان أنعرف أني سعودي وإلا أمداني أنشهرت من يومياتي

في الدرة!؟؟؟؟

قال ياشيخ كناية قلت أييييييه قال السيارة حقت واحد مسلفني أياها قلت

طيب ليه ماتدق عليه يرسل لك فلوس قال شكلك فاضيييييييييي قلت أيه والله

وش رايك نروح نكمل سواليفنا عند مكينة الصراف لأن مكيفها

بااااااااااااااااااارد ماشاء الله...

قال أقول معك دراهم وإلا لا قلت معي والبضاعة معك؟؟؟؟

قال أي بضاعة فقلت أي فلوووس (خفت أنه يكون مباحث بغيت أذب الميه)

قال فلوووووووووس تعطيني لأني محتاج قلت له وش اسمك؟؟؟

قال هيثم وأطلع دفتر العائلة ولالقيت أسمه قلت يالأجودي ماأنتب من عيالي

وشلون أعطيك قال صدقه قلت أوصف لك بيت الملك لأنه هو الوحيد اللي

يقسم صدقات في هالديرة والوزراء والتجار اللي عندهم دراهم والباقي

صاروا مستحقيين...!!!!

قال ياخيييييييييييي شكلك فاضيييييييييي بقووووووووووووة

وراااااااح وأنا الحسرة تعتصر قلبي ليه ماصورت معه والسيارة عشان

أخليها لي توقيع في الدرة.....

والسلام عليكم ورحمة الله وبركاته،،،

**شيخ النظر** · June 28th, 2009, 07:00

بسم الله الرحمن الرحيم

السلام عليكم ورحمة الله وبركاته،،،

الحفرة

فيه حفرة في مدخل أحدى القرى كل يوم تطيح فيها سيارة...

المهم أجتمعوا أعيان القرية أجتماع مغلق لمدة سنه وبعد سنه كانت أجندة

الإجتماع كالتالي:

توضع مركبة أسعاف بجانب الحفرة كي ينقل المصابين مباشرة إلى

المستشفى العام...

مداخلة من أحد الأعيان طيب لو طاحت سيارة أثناء نقل الأسعاف للمصابين

لذلك يلغى القرار الأول وتوضع سيارتين...

مداخلة من أحد الأعيان طيب لو طاحت أكثر من سيارة أثناء نقل الأسعاف

للمصابين لذلك يلغى القرار السابق وتوضع جمعية للهلال الأحمر بجوار

الحفرة...

مداخلة من كبيرالأعيان طيب ليه الخساير هذي كلها تدفن الحفرة وتحفر

آخرى بجانب المستشفى العام عشان اللي يطيح فيها من قريب ينقلونه

المستشفى العام...

وهذا حال معظم القرارات والأنظمه في بلادنا الحبيبة.....

والسلام عليكم ورحمة الله وبركاته،،،

**شيخ النظر** · June 28th, 2009, 07:04

بسم الله الرحمن الرحيم

السلام عليكم ورحمة الله وبركاته،،،

التميس الحساوي

يبدو أنكم مالحقتوا على التميس الحساوي المخبوز في تنور الأثل وعسبان

النخيل الموجود في الجفرة جنب سوق الغنم في الديرة اللي مكانه الآن

سوق التعمير كان عفتوا خبز البخاريين لذلك إذا رحتوا الأحساء تلاقونها

حول فندق الغزال شئئئئئئئئئ يدوخ والفول تلاقيه حوله فول على الطريقة

الحساويه ومن هذا المكان أحيي الشباب السعودي في الأحساء الذي مازال

متمسك بأشغال وأعمال الأجداد من زرعة وغيره إضافة للميكانيكا وبيع

وشراء حتى العاملات في المشاغل الغالبية سعوديات...

أسمحوا لي على مشاركتي هذي لكن طرّاها االشهيوه لأياااام زمان...

ولأني أنوي القيام بزيارة لمحافظة الأحساء التي يبلغ عمرها حوالي 1800

سنة للوقوف على بحث مبسط سأزود به يومياتي...

والسلام عليكم ورحمة الله وبركاته،،،

**شيخ النظر** · June 28th, 2009, 07:07

بسم الله الرحمن الرحيم

السلام عليكم ورحمة الله وبركاته،،،

مصيرها تروق وتحلا...

أمتحنتني هالمرأة متى ومتى ومتى؟؟؟؟

وأنا أقول (مصيرها تروق وتحلا)...

وتقول تبي تفجرنيييييييييييي فأقول ليه (tnt)...

حكمة اعجبتني وأصبحت استخدمها مع من أمون عليه...

فهذه الحكمة فيها قدر كبير من التفائل والطرافة التي قد تساهم في إشاعة

الأمل أو تخفيف التوتر أو إشاعة المرح أو كل ذلك...

ولكن تعمقي في هذه العبارة، وما تحمله في طياتها من فلسفة أسلوب حياة

معين، طرح علي عدد من الأسئلة ومنها:

متى تستخدم هذه العبارة؟

هل تستخدم في وقت الجد أم في وقت الهزل؟

هل يتقبلها منك شخص آخر يمر بظرف جدي أو عصيب؟

هل هي الحكمة الذهبية التي يحتاجها إنسان هذا العصر المشغووووول

جداً.. المدووووووش جداً؟

فلسفوا العبارة معي.. وافتوني فيها

وإلا مشغوليييييييين جداً ومندوشيييييييييين؟؟؟

وليه لسه ماراقت ولاحلت؟؟؟؟

والسلام عليكم ورحمة الله وبركاته،،،

**شيخ النظر** · June 28th, 2009, 07:24

بسم الله الرحمن الرحيم

السلام عليكم ورحمة الله وبركاته،،،

المطاعم

في التسعينات هجريه كانت الشركات الكوريه منتشره في تنفيذ المشاريع في

السعودية وكان المقاول الكوري دقيق في عمله وسريع في التنفيذ أحسن

بملايين المرات من المقاول المحلي المسوف والناهب لخيرات البلد وفوق

كل هذا عمالته جراذي بشريه (البنقلاديشيه)...

ومن مايميز الكوريين كانوا مريحينا من الكلاب المنتشره في الشوارع لأنهم

كانوا يذبحونها ويأكلونها فياليت زمانهم يرجع بدال مانشوف هالقتلا على

الدائريات وشوارع الرياض...

وبعدهم بفتره بسيطه أكتشف أحد المسافرين في طريق الحجاز حمير مرمي

رؤسها خلف أحد المطاعم التي أنتشرت ذاك الوقت بالعماله اليمنيه وكان يباع

على أنه لحوم جمال والصغير منها الجحوش على أنه لحم غنم وكانت الناس

تأكل وتستلذ...

وتدرج بنا الحال إلى أكتشاف مطعم في مدينة الرياض يبيع لحم القطط على

أنه لحم أرااانب وطق عصي عنده مافيه إلا بالحجز...

وواحد منزل إعلانات لأول مره في العالم مندي جرابيع ناوين يقرضون

الفيران والجراذي من المنطقه...

عادي الزباين مهبل ولابه غير مريشين من مكاتب البيئه...

والسلام عليكم ورحمة الله وبركاته،،،

**شيخ النظر** · June 28th, 2009, 07:25

بسم الله الرحمن الرحيم

السلام عليكم ورحمة الله وبركاته،،،

سعوديين

القهر البطحاء مليانه باعه متجولين وتمر من عندهم البلديه تضاحكهم وفي

مداخل الأحياء تبكيهم والسعودي أكبر علته من السعودي من وزير إلى خفير...

سعوديين...

ذبحنا في بعضنا...

تعاندنا...

تباغضنا...

مريضين...

عسى الله...

يشفي مرضنا...

فينا الحسد...

في هالبلد...

وعلى الله عوضنا...

مع الغريب...

واحدنا حبيب...

ومع القريب...

يصبح ذيب...

طبعنا مع بعضنا...

ولوفرضنا...

وفرضنا...

وفرضنا...

نبقى سعوديين...

جيدين...

بس على بعضنا...

هذا بلانا...

ياناشدنا عن مرضنا...

والسلام عليكم ورحمة الله وبركاته،،،

**شيخ النظر** · June 28th, 2009, 07:29

بسم الله الرحمن الرحيم

السلام عليكم ورحمة الله وبركاته،،،

الدجاج الوطني

ناكل الدجاجا مرتيني في اليومي نظراً لرخصهي وفي الصباحي الباكري

نأكل البيضا ونقاقي في زيحامن حتى نصلا إلى حضايرنا ومن ثما نرجعوا

إلى داجناتنا كي نناموا قليلاً ثم نصحو نقاقي إلى الليلي...

وكوكوكو... (وقولي ماتحسنت لغته بعد)

أي وطنية اللي في كتاب وأنا بعد غربة سنة أول ماوصلت للرياض سجدة

في ارض المطار وبست الأرض أحسبني وطني بست بزاق (حاشاكم)

اللصوص الذين ينهشون في جنبات بلدي ولكن حسبنا الله ونعم الوكيل...

هاع لاتنبط كبودكم بعدين يزعلون أن باقي في هذه الأرض المباركه واحد

عنده كبد لذلك تبسموا فأنتم في السعودية حيث مطرقة التاجر واللص

وسندان المتغافلين الذين لايخافون الله إلا من رحم سبحانه وتعالى...

والسلام عليكم ورحمة الله وبركاته،،،

**شيخ النظر** · June 28th, 2009, 07:31

بسم الله الرحمن الرحيم

السلام عليكم ورحمة الله وبركاته،،،

ksa

واحد رايح ويا زوجته لماليزيا وقابل واحد أمريكي وخوينا أنجليزيته مثلي

وجاي على قدها فلما سأله الأمريكي من وين أنت؟؟؟

قال له (usa) united state of america يعني الولايات

المتحدة الأمريكيه وهو يبي يقول (ksa) kingdom of

saudi arabia المملكة العربية السعودية وراح يومه ييرجع يسأله

ونفس الجواب وجاء واحد سعودي ونبهه وقال ماتفرق كلها حرف واحد

وهذا أكبر عيب لتعلم أي لغة أن لاتتقبل التصحيح...

والسلام عليكم ورحمة الله وبركاته،،،