قصيدة ....من لا صبر ما حاش طوله ونوماس

[المنتقد]

بسم الله الرحمن الرحيم
السلام عليكم ورحمة الله وبركاته ,,

حياكم الله جميعاً ,,عندنا لكم اليوم قصيدة بعنوان "من لا صبر ما حاش طوله ونوماس" ارجو ان تنال رضاكم والقصيدة تقول :-

يا سعود انا رجل حياوي وحساس

....................................ماني من اصحاب الوجيه الوسيعه

احرجتني وانا بالأبحار غطاس

.....................................اصارع الامواج واخشى الهزيعه

لولا الرجاء في خالق الكون والناس

.............................................لافر فرة خايف شاف ريعه

مار أتصبر وادفع الهم والياس

......................................بعزوم هومات الرجال الشجيعه

من لا صبر ما حاش طوله ونوماس

....................................والطيب لاهل الطيب سلم وطبيعه

بوجيهنا ناخذ والارياق يباس

.......................................والرزق عند اللي يدينه رفيعه

لو اتعرض يابن حواء للافلاس

..............................ما أرضى على وجهي تصير الشنيعه

والناس قالوا في قديمات الارماس

...............................ان ما طاوعك الوقت يا سعود طيعه

والرجل له بين الرجاجيل مجلاس

....................................معصم من عادات ناس وضيعه

يمشي على حد كما حد عباس

....................................ما يتخذ بعض السوالف ذريعه

نور الحيا في منظره تقل نبراس

...................................غذي على حب النقا والشريعه

يقصر خطاه ويازن الهرج بقياس

...............................والسر من صدره حشى ما يذيعه

وترى المعادن نوعها تبر وانحاس

................................والناس تعرف قيمته من لميعه

والصاحب الصادق على العين والراس

..................................نشري رضاه وقيمته ما نبيعه

لا شك جيل اليوم غادر ودساس

.................................يعطيك علم وخونته لك سريعه

حلو كلامه والبلا فيه من ساس

..................................لو زين الهرجه وعدد صنيعه

بسلوبه السافر يلولسك لولاس

..................................دجال ضاري للحيل والخديعه

وانا عن الاشكال هذي بترياس

......................................قفلت بابي بالقفول المنيعه


ارجو ان تنال استحسانكم ورضاكم والمعذرة عن كل نقص وتقصير ...والسلام عليكم ورحمة الله وبركاته ,,


القصيدة للشاعر :-خلف الحربي