بسم الله الرحمن الرحيم


السلام عليكم ورحمة الله وبركاته



ملعقة وشوكة وسكين




ملعقة : تصدقون أني مليت من هالشغلة ماغير شغاله في يد من هب ودب

ياأما شلت له الشوربة وإلا الأكل لفمه وعاد يالبعض أسنانه مكسرة وريقة

شين ماغير يشفط مافي بطني وإلا يلهطه ويترك على بطني وظهري

سعابيلة....




شوكة : لا أشوا أنا منك أنا إذا أستخدموني العرب كلوا فيني كيكة وإلا حلا

وإذا مسويين متطورين مكرونة إسباغيتي بس اللي قاهرني أني أشيل لهم

الأكل ويوصخون أصابيعي مثلك ياملعقة بالسعابيل والمعفن اللي يغسلني

ماينظف مابين اصابعي....



سكين : هههههههههههه أنا عاد فوق مستواكم كلكم أنا ماغير ابرد حرتي في

تقطيع الأكل ولاأدخل في شوربة ولافم ومن حطني في فمة قطعت لسانة مثل

ماكنت أسوي في بريطانيا من كان رأسي حاد كانوا ينكشون اسنانهم فيني

ولعبت في لثاتهم حتى عملوا لي راس دائري...





ملعقة : ماتدرون عاد القراوا وش يسون فيني يساووون ظهري ببطني

ويخلوني لاوجه ولاقفى بالشاكوش على بالهم متطورين ومخليني لدهن

التوست والصامولي...




شوكة : ولاتدرين بعد أنا عافطين رقبتي يقال عشان يأكلون فيني السبرنق

روول والقيمات يقال أنهم مايبون يتكلفون ويلفوني بيديهم إلا لازم الذلة...




سكين : أصلاً ربي كرمهم وعطاهم الخمس عشان يأكلون فيهم ولكن مابقى

إلا السعوديين اللي يأكلون بالخمس ياويلي وصرنا بس أنا والملعقة في العزايم

ملعقة جنب السلطة وأنا فوق الفاكهة حارس...




ملعقة : لاياخوي تكفا ماتدري وشلووون الحريم اكلهم فينا خصوصاً لين

غرفة من الشوربة ثم جت بتاكل الجاتوة تقعد تلحسني وجه وقفا وإلا تنطلني

فوق الصحن اللي كنّه ونيت محمل للحراج من لخبطة ماظفت من البوفيه

المفتوح....



شوكة : لاتذكريني تكفين بالبوفيه المشفوح ماعاد هو بمفتوح كاني من أشوف

الوحدة كاشخة أقول هذي اللي ليتها تأخذني ومن أصير بيديها وتحطني فوق

ذاك الصحن حتى ماأدري وين انا من أنواع اللحوم والدجاج والكبة وورق

العنب والمصقعه ناهيك عن أنواع الحلا والكيك...


سكين : البوفيه المذبوح أنا الحمدلله مايعرفون يستخدموني الحريم (الشغالات)

إلا في تقطيع البصل والطماط وبما أن الأخريات مايعرفوني فهم يتحاشوني

في البوفيهات نظراً لجهلهم بما هيتي...!!!




لحظة صمت


فتح الدرج الولد وأخذ ملعقتين عشان يصلح فيهم كفر سيكلة والبنت خذت

شوكتين تمشط فيهم شعر عروستها فجاء الولد الصغير الثاني وآخذ السكين

يبي يدخلها في فتحة القفل عشان يفتح الباب والبنت خذت سكين عشان تفك

برغي (مسمار) حق الدفيدي وأكتشفوا الثلاثة أن مستقبلهم ماله سنع أبد في

بعض البيوت...



والسلام عليكم ورحمة الله وبركاته