قل له تراني على ذاك العهد باقـي

مشتاق للي يهز ّ القلب طاريه = اللي له سنين مدري وين اراضيه
والروح من عقبه زادت بلاويه = والحال من فرقى الغالي معنـّـيني

اتذكّـر الماضي اللي زين مضمونه = وسطه غرام وحب واشواق مجنونه
واليوم حالي تعب وازدادت طعونه = يازين ذاك الوقت وينه وانا ويني

ياطير وصـّـل رسالة حب للغالي = عنوانها " وين انت " يامالك ٍ حالي
وضـّح بها همّـي وغمـّـي وغربالي = من عقب ماغاب نوره واظلم سنيني

قل له تراني على ذاك العهد باقـي = ما احبّ غـيره ولو زادت بي اشواقي
نقشت حرفه بدمـّي داخل اعماقـي = وعنونت باسمه قصيداتي ودواويني

وقل له بأني قبل ما انام اتذكـّـر = يوم الأصابع تشابك والغلا يكثــر
وعيونه بعيني وباحلامنا نفكـّر = واقـول احبـك واضـم ايديـه بيدينـي

ياطير وش ينتظر ذاب وطفى شمعي = وازداد ياطير من كثر الألم دمعي
وصوته ترا ياطير متملّك ٍ سمعـي = ماغير افز أحس ّ انه ينادينــي

وختامها ياطير قل له ترا الصـّوره = ولـّعت فيها بعد ما إختفـى نوره
لذلك الشـوق فيني أشعل الثـّـوره = قله ترا ماغيره اليوم يطفيني






مما راق لي