قال لي صاحبي وهو يناولني فنجال الشاهي تراك امعزوم على عرسي
قلت ليه سلامة ام العيال ؟؟؟؟
قال مافيها شي بس انا ابجدد شبابي
أي شباب يابو الشباب ؟؟؟
وش قصدك ؟؟؟
ابد سلامة عمرك
انا داري انك علة كايده ماوراك الا ضيقة الصدر
طيب ياوسيع الصدر وش اللي تبي تجدده في شبيبك السكروالا الضغط والا ركيباتك اللي تصافق مع بعضها وطقطقتها كنها مقصات ونيت مصدي
حسبي الله عليك يعني من زين شبابك انت وخشتك؟؟؟
ايه بس انا شايب مانيب متشبب مثلك
بلاك ياميت القلب ماجربت الزواج ثاني مره والا انت خايف من ام العيال
تعرفني غاسلن وجهي بمرقه والله ماعندي فيك ولا فيها
طيب وش رايك اخطبلك ويحيدة حليوه ؟؟؟
الا ماتقللي كم عمر العروس ؟؟؟؟؟
احم احم هه والله من السبعه والعشرين وفيها
يعني ثلاثين سنه
وبراسك ثلاثين سنه وش تبي بعد؟؟
اقصد الفرق في السن
حسبي الله عليك يانك اقشر وتكدر الخاطر الشرع حلل اربع وش فيك انت ؟
لالالا انا ما اعترضت على التعدد ولا على زواجك لكن
اها وش ورى لكن يا فلسسوف
خلنا نا خذها بالعقل هي 27 وانت 57 وبعد ثمان سنين هي 35 وانت 65
ايه وش بعد ؟؟؟
يعني حدى امرين اما انك قد ودعت الملاعب او انك كحيان وربما منتهي الصلاحيه يعني زوج مع وقف التنفيذ
اقول يازينك ساكت يا هالوجه الودر يعني انت ضامن اني باموت في 65؟؟؟
استغفرالله ما هذا قصدي ولكن لنفرض انك وصلت السبعين قبل ما يزقطك عزرائيل
وبنت الناس في الاربعين يعني يعني المعنى في بطن الشاعر
وتالية هالكلك وشهي ؟؟
ياخي لا تكدر خاطرك انا واقعي
وقعت عليك بقره
طيب هات السالفه من تاليها ياواقعي ولكني والله ابطيب خاطرك عقبها
اجل السموحه ابروح عندي شغل
( سبحان الله براد شاهي طاير والا فنجال مجنح )
اقول اقعد وسمعني باقي هلفستك
يابن الحلال عاد اركد وخل عنك الحماقه واسمع كلامي ان اعجبك فأهلا وسهلا وان ماعجبك منت خسران شي
والله بس يومنك صديقي والا كان عرفت اتفاهم معك
(ا وفيها تفاهم بعد)؟؟؟
اسمع يعني خلال الثمان سنين او اكثر منهن والعلم عند الله لوجاك كم ذري هذولا وش مصيرهم وانت شايب مكركب وجا الموت واشتالك من كراعينك وش بيصير حال هالايتام ؟؟؟؟؟
فال الله ولا فالك يالودر
ياخي خير الله كثير وماعلي قصور بيوت وحلال من فضل الله
ماقلنا شي والمال ماهوب كل شي طيب ما سألت نفسك في عجزك او موتك من يتولا تربيتهم ؟؟ أمهم ستبذل كل ما في وسعها ولكن مجالها محيط البيت فقط تقول اخوانهم الكبار ؟؟ اقول ماعندك احد كل مشغول ومطحون ابدنياه والله لست معترضا على التعدد أبدا بل انني انا نفسي ودي به وماردني مال ولاغيره ولكن الواحد يفكر قدام إذا صار حاله في تراجع من جهة الأبناء والخلفه ولست متشائما أو منكرا لفضل الله ولكن زمننا هذا زمن أغبر كما يقال والأخطار محدقة بأبنائنا من كل حدب وصوب
وهذا مصدر القلق والخوف على مصير ابناائك معك وأنت على كبر ومن بعدك الحال أسواء بكثير هذا من ناحيه ومن ناحية أخرى يجب على راغب التعدد أن يرى بعقله لابعواطفه ورغباته فليس من العدل والإنصاف في نفسك وفي حق الزوجة الثانيه ان تتجاهل فارق السن فمثلا لوكان الفارق من 17 إلى 20كحد أقصى لربما وافقتك وعلى مضض ففرق ثلاثين سنه في رأيي الشخصي ورغم مشروعية ذلك إلا انها جريمة شخصية حتى وإن كانت مؤطرة بالبرواز الإجتماعي فإن لها أبعادها الإجتماعيه السلبيه وهي ضياع شباب امرأة لإرضاء نزوة ورغبة
متصابي أو شيخ أناني
حتى لو كانت شرعيه وخل بالك هذا ليس اعتراض على شرعية ومشروعية التعدد ولكنه اعتراض ورفض لعرف اجتماعي في جوانبه السلبيه من الجانب التسلطي من الرجل كزوج وولي وليس من حيث المبداء ما قصدته كل واحد يدور هبرته على قد سنونه يعني مثل ما يمد رجليه على قد لحافه أيضا لايمدن عينيه لأبعد مما يبصر ولايحمل اكثر مما يحتمل ولا يحرث من الأرض إلا على قدر مؤونته وبس
وبس هذا كل اللي عندك ؟؟؟
إيه بس يعني خلاص
اقول قم بس قم اقلب وجهك وورني مقفاك ياوجه الفقر
يابن الحلال هد اعصابك عاد انت تحط عقلك بعقلي
قلبت وجهي اوعطيته امقفاي والحمد لله على السلامه
