اقتباس:
إضافة لأنواع العيش الخبز لديهم فكله لذيذ الطعم خفيف على المعده ربما أنهم يزرعون ويحصدون بدون أسمدة كيماويه حتى دجاجهم يكمل نموه بيَاضا أو لاحما بصورة طبيعية جدا وربما يبلغ عمر الدجاجة ستين يوما قبل ذبحها بينما عندنا البنغاليين شايفين شغلهم وعلى روسهم كبار المنتجين فما يكاد الكتكوت يببلغ اسبوعين الا وهو متورم كدجاجة وزنها 1200جرام وأحيانا 1500 وبالمناسبة لي صديق يعمل كطبيب استشاري كشف لي أن دجاجنا يعطونه مواد كميائية عبارة عن هرمونات مؤنثة وهذا الدجاج قد لايؤثر في النساء ولكنه عدو مبين لنا كرجال بل ويؤثر تأثيرا سلبيا محبطا على مواهب الرجال
وجربوا الدجاج الفرنسي وسوف تلمسون الفرق وتشمون العافيه ثم تردحون وكأنكم ترقصون
قبل ما أنسخ المنسوخ أعلاه طنت في راسي اروح سوق الغنم اشتريلي تويس والا هرفي وتذكرت الهرمونات المؤنثة اللي يعطونها الدجاج عشان تنمو بسرعة وتتورم وخذتني الرخامة وقمت اقدم رجل وأخر ثلاث والحقيقة والله دخلني الوسواس الخناس وخفت بالحيل بالحيل وبياعين الغنم والعجول وحتى البعارين ذممهم واسعة اوسع من الانفاق الا مارحم ربي منهم وترى والله ياجماعة الخير وسواسي وخوفي في محله
وروحوا شوفوا العجول الواحد كبر الثور والثور كبر وحيد القرن طيب انا وش اسوي يامسلمين
لافيه تيوس فرنسية ولا حتى حسلان وفي غمرة حوستي وهلعي تذكرت ايام المزرعه وحضيرة الغنم ويهزني الشوق وقاعد افكر اشتري 200جفرة ( عناق )
(عنزة صغيره )
وعندي باقي من عمال المزرعة اثنين احطهم
يربون ويرعون ويطببون ومن خططي القديمه ان الجفرة بعد اربعة أشهر تكون جاهزة للتلقيح وتضرع لمدة خمسة أشهر وتنتج راس ونص يعني ال200 تجيب بإذن الله 300على الأقل ومن ثم نسمن التيوس بدون كيماوي وهرمونات واحتفظ بالإناث وكل وحدة لها كرت حياة علمي حسب خبراتي من يوم انا ورع يوم كنت بدوي قح مهنتي رعي الغنم وطبقتها في المزرعة وهه يعني نجحت رغم جرائمنا المتلاحقة بالإفتراس منها لنا وللضيوف
بس بقي مسألة هامة وهي البحث عن مزرعة بالإيجار طويل الأجل على طريق الساحل من جدة باتجاه الجنوب يعني في أقرب شريط من تهامة عسير وكل هالخرابيط مجرد هواجس وأحلام مثل احلام زللوط
لكن ولدي خالد الله يصلحه ثبطني وقال الكلام هذا مايصلح
ليه ياولدي ؟؟
قال في حفر الباطن الأرض كلها امطار و شعبان وحتى الشباب خريجين الجامعة يربون الغنم هناك لأنها تاكل من العشب وماعليك الا تشتري شوية ضرمه
قلتله لكن ياولدي انا مثل ما تعرف مهووس بالطبخات والأكلات اللي من اختراعي وودي
انتج كميات من التيوس على شان اسوي مطعم عجيب غريب اسوي فيه الاكلات اللي تعرفونها كلكم يعني بغض النظر عن تكلفة التيس فبيعه مجهزا كاملا أو مجزاءا يسوى 900ريال قياسا على روعة طعمه وطريقة اعداده النادره
قال يابوي والمؤسسة وش تسوي فيها ؟
قلت عاد ماشاء الله من كثر حضوري فيها
يكفي عبد الله ومحمد وجمال واخوه منير!!!!!
قال بس يابوي انت كبرت ولا تقدر تطبخ وتنفخ في مطعم
نفصت اعيوني فيه
وقلتله انت من عقلك ياخبل
انت من عقلك تبيني
اطبخ وانفخ في مطعم ؟
قال هاه اجل كيف ؟
ياطبل اجيبلي اثنين أو طاقم طباخين فلبين وادربهم على الطريقة في اللف والإعداد والعمل على الفرن الكبير اللي بسويه ان شاء الله
قال طيب بكرى يسرقون المهنة ويهربون منك
لالالا انا بنفسي اخلط كميات البهارات الصلبة لحالها والخضراء لحالها
وماعليهم الا يستعملون الميزان بدون ان يغرفون الكميات الصغيرة وماهية أغلبها وإن عرفوا بعضها فلن يستطيعوا أن بوالفوا بين المقادير
انت نسيت ان ابوسالم يوم سوى مطعمه دفعلي ثلاثين الف ريال على شان اعطيه تركيبة الخلطه وما رضيت وما وافقت ؟؟؟
تدري كيف ؟
ابيك تروح معي حول الليث وشرقه ندورلنا على مزرعه
يابوي الله يطول عمرك ياكثر مشاريعك وش تسوي منها ووش تخلي
مرة بتسوي ساحة تخزين ورفع حاويات ومرة بتشتري تريلات ومرة بتسوي شركة ليموزين
اسمع اسمع
ساحة التخزين خطيرة بالحيل وانا ماعندي لها فلوس تغطيها وبنك التفليس موقف قروض المعدات
وحتى التريلات موقفها بعد واللموزين اكثر من الجراد والحكومة تهدد بسعودة الليموزين
لكن خلني امخمخ في المطعم والتيوس
