قصيدة سليمان الجمهور برد على حمود البدر رحمهم الله..
السلام عليكم ورحمة الله وبركاته :
بسم الله الرحمن الرحيم
قصيدة الشاعر الكبير سليمان بن جمهور ردا على الشاعر حمود البدر رحمهم الله
جنح الدجى جاشي به الفكر حارا
محتار مدري كيف تندار الاقدار
عفت الكرى ومضاجعي للعذارا
لكن يطعن ثومة القلب مسمار
قبل البشير امحيسنن مع نهارا
والربع قسمين بهم بارد و حار
احد يقول الحكم ياناس دارا
لابن صباح اللي ولى بر وبحار
واحد نذر واحد حلف بالجوارا
ما صار مثله بالجزيرة والاقطار
واحد صعد بالمدح راس المنارا
لمبارك لولا الحيا ياملا طار
اندار مدحه مع خماله خسارا
اصبح وظنه مابلغ عشر معشار
الحمد للي دبر امره وسارا
المطلع عالم خفيات الاسرار
ينصر ويدمر والكسر والجبارا
بيد الولى قهار دمار الاعمار
واخلاف ذا ياراكبين البكارا
عيرات من ذروات حصات الاوبار
خمس وخمس عيونهن كالشرارا
مافوقهن غير السفايف والاكوار
سمحات الادمي نابيات الفقارا
عوص النضا من نسل ذروات عتار
خمص الخواصر مانشن بالحوارا
محنونيات مثل الاقواس ضمار
من جال دار خيار ما بالديارا
اهل الزبير اكرام واجواد واخيار
ما ينوجد نمام فيهم وصارا
بخس العدو اللي لهم سار زوار
اولاد نجد بالفخر والممارا
بالطيب والا بالردى مالهم كار
ياركب سيروهن نهار المجارا
على عيونن لوذوهن بالاكوار
من الحزم عقب العزم سيروا يسارا
وخلوا حسن بصري يمين عن الدار
ياركب هيا الحذار الحذارا
اليوم او يوم تقيمون خطار
ارخوا لهن الخطم ليل ونهارا
حتى تجون حمود بالدار محتار
اقروه مني بالتحيه وقارا
ما جاء ليل اوسطع نور الانوار
وخذوا له الخاطر وقولوا مجارا
ماجور يامكسور من غير جبار
من عقب قيلك ماعليك المدارا
كيف انت مع ربعك على ظفة النار
ياحمود من قبلك بقيله تجارا
يمدح ويقدح والفعل مابعد صار
جورك ومكرك يابن ناصر اكبارا
اخطيت ياعمي البصيره بالافكار
هالكيف تبني لك من الكذب دارا
وتشيد المبنى على درب الاخطار
لاعاد مال الملتجي به قرارا
لارحم ابو من دك باجدارها احجار
مبنى بنيته صار ساسه هيارا
سوس على الشاطي شفى جرف وانهار
الكذب به شؤم ولؤم وعارا
تقول حنا من صواريم سنجار
اعيال الحرار مثل اباها حرارا
وجميع طير لا يغرك ولو طار
ان كنت واعي انتبه لا توارا
هيهات مالدرهم يشابه لدينار
المدح ما يطول ايدينن قصارا
ايضا ولا يقصر طولين الاشبار
تمدح مبارك ياعشيرالسكارا
قبل الفعل له كار مع ذا وتعبار
وحنا لمدحة مانقوله جهارا
الا بفعل يابوناصر وبتار
ماصارمثل الضيغمي لاتوارا
اقفى على عين المعادي بالادبار
لابد له من دورة وافترارا
مراكب تفتر واعيون واسبار
ويلا ارجفت معها السبايا وسارا
يشبه هتاتيك الهواجر والانصار
حالوا ولا زالوا اجالوا حذارا
هدوا ولا ردوا لك الله عن الحار
هذا فعل سكان حايل قفارا
ظنك بهم ما كملوا دشن الاكوار
من ولبهم دور قوي المثارا
خلوه يرغي عقب ما كان هدار
من قبل ما يكنى بامير الامارا
والناس بامره بالبراري والابحار
واليوم دخل بالمناور نصارا
اللي براسه طاح من زود واسطار
اللي خلا وجهك سواد وسمارا
حيثك خبير وداري مير مكار
هالكيف لاسرار المغيب اتجارا
ياحمود ليه ابناك ما هو بمسخار
لاعاد مالك بالعلوم انتظارا
واللي اخذته من مخثار الاخبار
تخوض ببحور تلاطم غزارا
بامر الولي تندار باقبال وادبار
يضع ويرفع ثم يسمع ويارا
ويبرم دواليب بالاقدار تندار
بالغيب لك رجم بليا انتظارا
حكمت ربعك بالحكايا والاشعار
الحكم ماهو بالمنى والممارا
ايضا ولا بالطهبله تاخذ ادبار
ياليت لو ماسك السانك هجارا
ماكان صار من الشعر مثل ماصار
ياحمود سرتم من بلدكم بطارا
وزمتكم انفسكم لحكم وتعبار
وثرتوا وصرتوا بالتماني امارا
وطابت لكم قطع الفيافي والاقفار
يقوم به مغصوب واحد مكارا
مابين بحري والحضر واهل الاهوار
قوم باهلها يابن ناصر تجارا
وقبل الملاقى تحسب القوم من الدار
غرتكم المده ليال ونهارا
حتى انتهت مدات انفاس واعمار
يوم انت بالتنهات ترعى خضارا
وامربع تقطف زماليق وازهار
الحر خطو النوب يخطي الحبارا
والضين ترتع دام سرحان ماشار
ياحمود وين جنانك اللي تجارا
ظنك بها تغذى شجرها والاثمار
اصبح وماها غاير ثم غارا
قبل المسا غارات وشبت بها النار
تقول ما يطري علينا انحدارا
تبون حايل مع قفار لكم دار
خاب الرجا فيكم وصرتوا اسارى
هب الولام وداركم دور زوار
بين الصريف وبين هاك الزبارا
حقت ولا بقت لكم عين ديار
جاكم بلاكم من هواكم وصارا
نهاركم ليل وضاعن الافكار
يوم شرير به ضرام وشرار
هب الهوى باهل السناعيس واندار
ذي لابة ما يلبسون الوزارا
ماجمعوهم من حساوي وبحار
ناضوا ولا جاضوا وخاضوا حسارا
ساروا ولا باروا مخافه من العار
سلوا ولووا في سيوف النصارى
مع صنع ابن باني للارقاب بتار
قوم على قب عبيد وحرارا
باكبودهم حرد وبقلوبهم نار
قوم لاخو نوره بليل ونهارا
ياطون ما ياطا شخانيب سنجار
قوم تفت بكيدهم والممارا
حريبهم يشرب قراطيع الامرار
قوم لها يوم تبيع العمارا
من ولب ضرب اسيوفهم تشتعل نار
قوم تراها من طنايا سدارا
على الحكم عيت بالاملح والحار
قوم لها بقلوب اعداها وقارا
ان ذكر حربهم عند حلو الكرى طار
قوم بها زوم بنهار المثارا
يشفي غليله من قبيله اذا سار
قوم ربوا بالحرب ماهم تجارا
ماله حذى دشن الميارك والاكوار
قوم لها عز ونصر تبارا
لعل عزه بالجزيره والاقطار
قوم لها مني سلام ووقارا
جميعهم ما بين كهال واصغار
وانتم سالمين وغانمين والسلام
